لاہور(سپورٹس رپورٹر) کیپٹن بابر فصیح امین (شہید) سپورٹس کمپلیکس فیز 6، ڈی ایچ اے لاہور میں ہونیوالی 38ویں مردوں کی اور دوسری خواتین کی قومی ایلیٹ باکسنگ چیمپئن شپ کا افتتاحی تقریب کیساتھ با قائدہ آغاز ہوا۔پانچ دسمبر تک ایونٹ میں مردوں کی 12 ٹیمیں جبکہ خواتین کی 7 ٹیمیں حصہ لے رہی ہیں جن میں مختلف ویٹ کیٹیگریز کے مجموعی طور پر 153 مقابلے ہونگے۔ 145 مردوں اور 27 خواتین کا اندراج ہوا ہے۔ایڈمنسٹریٹر ڈیایچ اے لاہور برگیڈئر وحید گل ستی تقریب کے مہمانِ خصوصی تھے۔انہوں نے چیمپئن شپ کے انعقاد پر باکسنگ فیڈریشن اور ڈی ایچ اے لاہور سپورٹس برانچ کی مشترکہ کوششوں کو سراہا ۔ انہوں نے 2 مقابلے دیکھے، پہلا مقابلہ بلوچستان کی رابعہ بتول اور آزاد کشمیر کی سیرت پرویز کے مابین ہوا جس میں رابعہ(بلوچستان) سرخرو ہوئیں۔ دوسرا مقابلہ نیوی کے زوہیب رشید اور آرمی کے محمد فہیم کے مابین ہوا، جس میں زوہیب سرخرو ہ ہوئے۔