لاہور (سپورٹس رپورٹر)پاکستان ویمنز کرکٹ ٹیم ورلڈ کپ کوالیفائر میں شرکت کے بعد زمبابوے سے وطن واپس پہنچ گئی، قومی ٹیم 3 دن قرنطینہ میں رہے گی۔قومی ویمن ٹیم ورلڈ کپ کوالیفائر میں شرکت کیلئے زمبابوے میں تھی لیکن کرونا خطرات اور سفری بندشوں کے باعث ویمنز کرکٹ ورلڈ کپ کوالیفائر کو ختم کردیا گیا۔ایونٹ منسوخ ہوجانے کے بعد قومی ویمن کرکٹر زمبابوے سے براستہ عمان اور وطن واپس پہنچی ہیں۔ذرائع محکمہ صحت کے مطابق قومی ویمن کرکٹ ٹیم نمیبیا سے ہوتی ہوئی گزشتہ صبح پاکستان پہنچی ہے، مقامی ہوٹل میں 27 افراد بشمول کھلاڑیوں کو قرنطینہ کیا گیا ہے۔ذرائع نے بتایا کہ ویمن کرکٹ ٹیم کو تین روز تک قرنطینہ میں رکھا جائے گا، اس دوران تمام افراد کے پی سی آر اور دیگر ٹیسٹ بھی کئے جائیں گے۔ تاحال کسی کھلاڑی اور عملے میں وائرس کی کوئی علامات نہیں ، 3 روز کے بعد عملہ اور کھلاڑی گھر جا سکیں گے۔