لاہور(نامہ نگار) پیپلز پارٹی وسطی پنجاب کے صدر راجہ پرویز اشرف نے کہا ہے کہ جو کہتے ہیں پنجاب میں پیپلز پارٹی کمزورہے ،وہ یہاں آ کر دیکھیں،ہم ہر سیٹ پر مخالفین کو شکست دیں گے۔ان شا اللہ جیت ہماری ہو گی۔ان خیالات کا اظہار انہوں نے گزشتہ روز پیکو روڈ سے شروع ہونے والی پیپلز پارٹی کی انتخابی ریلی سے خطاب کرتے ہوئے کیا ۔ریلی میں عوامی تحریک کے مرکزی سیکرٹری جنرل خرم نواز گنڈا پور ،  پیپلز پارٹی کے امیدوار اسلم گل،حسن مرتضی،قمر زمان کائرہ ،ثمینہ خالد گھرکی اور دیگررہنما بھی موجود تھے۔ریلی سے خطاب کرتے ہوئے راجہ پرویز اشرف نے کہاکہ اللہ کی مہربانی اور عوام کی طاقت سے اسلم گل کامیابی کی طرف بڑھ رہے ہیں۔ یہ ریلی پیپلز پارٹی،عوامی تحریک،مجلس وحدت المسلمین کی طرف سے ملک میں اندھا دھند مہنگائی اور بے روز گاری کے خلاف ہے ۔جس کی وجہ سے عام آدمی کے گھر کا چولہا ٹھنڈا ہو چکا ہے۔حکومت نے عام آدمی کا سکھ چین سب چھین لیا ہے۔آصف زرداری نے پیغام دیا ہے کہ پیپلز پارٹی پوری شان کے ساتھ باہر آ چکی ہے۔منہاج القرآن اور عوامی تحریک قیادت کے شکر گزار ہیں۔عوامی تحریک کے مرکزی سیکرٹری جنرل خرم نواز گنڈا پور نے کہا کہ جلسے اور کامیاب ریلی سے ثابت ہو گیا کہ لاہور( ن) لیگ سے چھن گیا ہے۔شہر لاہور کو پیغام مل گیا کہ شریفوں کا دور گزر گیا۔اب مستقبل پیپلز پارٹی کا ہے۔ عوامی تحریک کھل کر پیپلز پارٹی کے ساتھ کھڑی ہے۔ حسن مرتضی نے کہا کہ لاہور کے نہتے جیالوں اور عوامی تحریک کے ساتھیوں نے ثابت کر دیا کہ لاہور ان کا ہے۔35برس تک عوام کے حقوق کا سودا کرنے والوں کو ووٹر پانچ دسمبر کو مسترد کر دیں گے۔اسلم گل نے کہا کہ جیالوں اور جیالیوں نے ثابت کر دیا کہ 70کی بھٹو کی پیپلزپارٹی واپس آ چکی ہے۔داتا کی نگری پیپلز پارٹی کے ساتھ ہے۔بلاول بھٹو زرداری اور آصف زرداری کو مبارک دیتے ہیں۔5دسمبر کوجیت کا جشن منائیں گے۔قبل ازیں پیکو روڈ پر ریلی کی گاڑیوں کے آگے کارکنوں نے پیپلز پارٹی کے ترانوں پر بھنگڑاڈالا۔ٹریفک جام کے باعث راجہ پرویز اشرف،حسن مرتضی،اسلم گل ،قمر زمان کائرہ اور دیگر قائدین کو پیدل دفتر پہنچنا پڑا۔