لاہور (سپورٹس رپورٹر) پاکستان اور ویسٹ انڈیز کے مابین 13 سے 22 دسمبر تک تین ٹی ٹونٹی اورتین ون ڈے میچز کیلئے 100 فیصد تماشائیوں کو سٹیڈیم آنے کی اجازت مل گئی ہے۔ پاکستان کرکٹ بورڈ نے ٹی ٹونٹی میچوں کے ٹکٹوں کی قیمتیں 250 سے 2000 روپے مقرر کی ہیں۔ جنرل انکلوژرز (انتخاب عالم، اقبال قاسم، محمد برادران، نسیم الغنی اور وسیم باری) کی سیٹوں کی قیمت 250 روپے ہے۔ فرسٹ کلاس انکلوژرز (آصف اقبال، ماجد خان، قائد، وقار حسن اور ظہیر عباس) کی قیمت 500 روپے ہے۔ پریمیم انکلوژرز (عمران خان اور وسیم اکرم) کی ٹکٹ کی قیمت 1000 روپے رکھی گئی ہے جبکہ وی آئی پی انکلوژرز (فضل محمود، حنیف محمد اور جاوید میانداد) کی ٹکٹوں کی قیمت 2000 روپے رکھی گئی ہے۔ نیشنل کمانڈ اینڈ آپریشن سینٹر کی طرف سے جاری کردہ گائیڈ لائنز کے مطابق 12 سال سے زائد عمر کے افراد کو مکمل طور پر ویکسین لگوانا ضروری ہے جبکہ 12 سال سے کم عمر کے بچوں کیلئے کسی قسم کی ویکسینیشن کی ضرورت نہیں۔ ٹکٹ، CNIC اور نادرا سے جاری کردہ امیونائزیشن سرٹیفکیٹ دکھا کر میچز دیکھے جاسکیں گے۔دونوں ٹیمیں 18، 20 اور 22 دسمبر کو تین ون ڈے میچ کھیلیں گی جو آئی سی سی کرکٹ ورلڈ کپ سپر لیگ کا حصہ ہیں جس کیلئے ٹکٹیں 100 روپے سے شروع ہوں گی اور 1000 روپے تک جائیں گی۔ جنرل انکلوژرز میںٹکیٹیں 100 روپے، فرسٹ کلاس میں 250 روپے جبکہ پریمیم ٹکٹیں 500 روپے اور وی آئی پی ٹکٹیں 1000 روپے میں دستیاب ہیں۔