لاہور(سپورٹس رپورٹر)ویسٹ انڈیز کرکٹ ٹیم کے ہیڈ کوچ اور سابق ٹیسٹ کرکٹر فل سمنز کا کہنا ہے کہ شاہین شاہ آفریدی، بابر اعظم اور محمد رضوان سے نمٹنے کے لیے حکمت عملی تیار کرلی ہے۔ فل سمنز نے کہا کہ پاکستان کے خلاف سیریز دلچسپ اور اچھی رہے گی، تمام تر توجہ صرف کرکٹ پر ہے، پاکستان کی ٹی ٹونٹی میں کارکردگی شاندار ہے، ون ڈے سیریز میں پاکستان کا بھرپور مقابلہ کریں گے۔ شاہین شاہ آفریدی بہترین بولر ہیں اور ان کا شمار دنیا کے پائے کے فاسٹ بائولرز میں ہو رہا ہے، ہم نے شاہین آفریدی کیخلاف حکمت عملی بنالی ہے، کپتان بابر اعظم اور محمد رضوان پر مشتمل ابتدائی جوڑی سے بھی نبٹنے کی منصوبہ بندی کرلی ہے۔ ہماری ٹیم میں نوجوان کھلاڑی ہیں، دیکھنا چاہتے ہیں وہ شاہین کیخلاف کیسا کھیلتے ہیں، پاکستان کیخلاف پاکستان میں کھیلنا ایک چیلنج کی مانند ہے۔پاکستان میں ملنے والی سکیورٹی سے بھرپور مطمئن ہیں، فراہم کی جانے والی سہولیات شاندار ہیں، ایک طویل عرصہ کے بعد پاکستان آنا اچھا لگا، پاکستان آکر ہمیشہ لطف اٹھایا ہے، پاکستان میں کبھی بھی کسی قسم کا کوئی مسئلہ نہیں ہوا۔اپنی ناکامیوں کو بھلا کر آگے کی جانب دیکھ رہے ہیں اور پاکستان میں بہتر سے بہتر کارکردگی دکھانے کیلئے کوشاں ہیں، ہمارے کھلاڑیوں کا اس پریشر میں امتحان ہوگا۔پاکستانی اوپنرز مسلسل اچھا پرفارم کررہے ہیں، کوشش کریں گے کہ اوپننگ جوڑی کی شراکت جلد توڑیں، اوپنرز جلد آئوٹ ہوئے تو پاکستان پر پریشر ڈال سکتے ہیں، میزبان اوپنرز کیلئے پلان اے بی سی تیار ہے، کراچی کی وکٹ مقامی ٹیم کیلئے سود مند رہتی ہے۔ بطور کھلاڑی جب یہاں آیا تھا تب حالات مختلف تھے، اب کرونا کی وجہ سے کہیں جا نہیں سکتے، ہمارا مقصد صرف سیریز جیتنا ہے، پاکستانی کھلاڑیوں کو ان وکٹوں پر کھیلنے کی عادت ہے، انگلینڈ اور نیوزی لینڈ کے پاکستان نہ آنے  سے ہمارے کھلاڑیوں کو کوئی دشواری نہیں، ہمارے کھلاڑی کھیل پر توجہ دینے کیلئے پراعتماد ہیں، مجھے اپنے کوچنگ سٹاف پر بھر پور اعتماد ہے۔