لاہور(سپورٹس رپورٹر)ایشین چیمپینز ٹرافی میں شرکت کیلئے پاکستان ہاکی سکواڈ ڈھاکہ پہنچ گیا۔ گول کیپرز وقار اور عبداللہ اشتیاق بھی ہفتہ کی دوپہر کراچی سے بنگلہ دیش روانہ ہوگئے، سینئر گول کیپرز امجد علی اور مظہرعباس کے ویزے تاحال موصول نہ ہوسکے جبکہ امجدعلی اور مظہرعباس کے ویزے اتوار شام تک متوقع ہیں۔ویزے موصول ہوتے ہی سینئر گول کیپرز بھی روانہ ہوجائیں گے، بروقت پہنچنے پر سینئر گول کیپرز ایونٹ میں قومی ہاکی سکواڈ کا حصہ ہوں گے، ایشین ہاکی فیڈریشن کے زیراہتمام ایونٹ میں 6 ٹیمیں شریک ہیں، پاکستان اور بھارت مشترکہ دفاعی چیمپینز ہیں، کوریا، جاپان، ملائشیا اور بنگلہ دیش بھی ایونٹ کا حصہ ہیں، ایونٹ راؤنڈ رابن لیگ طرز پر کھیلا جائیگا۔ پاکستان 14 دسمبر کو جاپان کے مدمقابل ہوگا جبکہ پاکستان اور بھارت 17 دسمبر کو ٹکرائیں گے۔