لاہور (نوائے وقت رپورٹ) پاکستان مسلم لیگ (ن) کی مرکزی نائب صدر مریم نواز کے بیٹے جنید صفدر کی شادی کی تقریبات لاہور میں جاری ہیں۔ گزشتہ کئی روز سے جنید صفدر کی شادی کی تقاریب کی ویڈیوز سوشل میڈیا پر وائرل ہورہی ہیں۔ اب سوشل میڈیا پر ایک اور ویڈیو وائرل ہورہی ہے۔ ویڈیو میں دیکھا جاسکتا ہے کہ مریم اور دیگر خواتین مہندی کی پلیٹیں اٹھائے جا رہی ہیں اور اس دوران مریم نواز شادی بیاہ میں گایا جانے والا روایتی گیت ’میرے نیہر سے آج مجھے آیا یہ پیلا جوڑا، یہ ہری ہری چوڑیاں‘ گا رہی ہیں۔ دریں اثناء جنید صفدر کی رسم حنا کا دوسرا فنکشن ہوا جس میں حمزہ شہباز اور دیگر مہمانوں نے شرکت کی جبکہ لڑکی والوں کی جانب سے چک شہزاد میں مہندی کی تقریب کا انعقاد کیا گیا۔  جنید صفدر اور اہل خانہ مہندی لیکر عائشہ سیف الرحمان کے گھر پہنچے۔ مایوں کی تقریب میں مریم نواز نے جنید صفدر کو مایوں بٹھایا اور شادی کے گانوں سے بھی خوب لطف اٹھایا۔ سارے پروگرام میں مریم نواز، جنید صفدر، کیپٹن (ر) صفدر گنگناتے نظر آئے۔ مریم نواز ’یہ پیلا جوڑا، یہ ہری ہری چوڑیاں‘ گنگناتے ہوئے گھر میں داخل ہوئیں۔ تقریب میں گھوڑوں کا ڈھول کی تھاپ پر رقص اور گلوکاروں نے بھی رنگ جمایا۔ بارات 14 دسمبر کو رات 8 بجے روانہ ہوگی۔ جنید صفدر اور عائشہ سیف الرحمان کی دعوت ولیمہ 17 دسمبر کو جاتی امراء میں ہوگی۔