اسرائیلی فوج کی فائرنگ سے فلسطینی نوجوان شہید
نابلس (این این آئی)فلسطین کے مقبوضہ مغربی کنارے کے شمالی شہر نابلس میں جبل ابو صبیح کے مقام پر اسرائیلی فوج کی فائرنگ سے زخمی ہونے والا فلسطینی نوجوان چل بسا۔مرکزاطلاعات فلسطین کے مطابق قابض فوج اور فلسطینی شہریوں کے درمیان جبل ابو صبیح کے مقام پر جھڑپیں ہوئیں۔ قابض فوج نے اس موقعے پر توڑ پھوڑ اور لوٹ مار کی، فلسطینیوں کو تشدد کا نشانہ بنایا اور زخمی ہونے والوں کو ایمبولینسوں کی مدد سے اسپتال لے جانے سے روکا۔عینی شاہدین نے بتایا کہ اسرائیلی فوج نے فلسطینی شہریوں پر دھاتی گولیوں کی فائرنگ کی۔ جبل ابو صبیح میں اسرائیلی فوج نے فلسطینیوں کے گھروں پر چھاپے مارے اور بیتا کے مقام پر فلسطینیوں کو زدو کوب کیا۔
