لاہور (کامرس رپورٹر) صوبائی دارالحکومت میں سادہ روٹی کی قیمت میں 2 روپے اور نان کی قیمت میں 3روپے کا جزوی  اضافہ ہوا ہے۔ شہر کے بیشتر علاقوں میں سادہ روٹی 10روپے اور نان 15 روپے میں فروخت ہو رہا ہے تاہم پوش علاقوں میں سادہ روٹی کی قیمت 12روپے اور نان کی قیمت 18 روپے ہو گئی ہے۔ واضح رہے کہ متحدہ نان روٹی ایسوسی ایشن نے آٹے اور میدہ کی قیمتوں میں اضافے کو جواز بناتے ہوئے 12دسمبر (اتوار) سے سادہ روٹی کی قیمت 2 اور اور نان کی قیمت 3 روپے بڑھانے کا اعلان کیا تھا کہ 120گرام نان کی قیمت 18روپے اور 100گرام سادہ روٹی کی قیمت 12روپے ہو جائے گی۔ ایسوسی ایشن کے  صدر آفتاب گل نے رابطہ کرنے پر کہا کہ ایسوسی ایشن کے اعلان کے مطابق سادہ روٹی اور نان کی قیمت میں اضافہ ہو گیا ہے۔ انہوں نے کہا کہ قیمتیں بڑھانے کے حوالے سے مذاکرات کے لئے حکومتی سطح پر اس حوالے سے کوئی رابطہ نہیں ہوا۔ انہوں نے کہا کہ اسلام آباد  میں سادہ روٹی کی قیمت 15روپے اور نان کی قیمت 20 روپے ہے۔