لاہور (سپورٹس رپورٹر)انٹر نیشنل کرکٹ کونسل اور زمبابوے کرکٹ سے وابستہ رہنے والے فیصل حسنین کو پاکستان کرکٹ بورڈ کا چیف ایگزیکٹو مقرر کر دیا گیا ہے۔وسیم خان نے ستمبر میں پی سی بی کے چیف ایگزیکٹو کے عہدے سے اپنی مدت ختم ہونے سے پہلے ہی استعفیٰ دے دیا تھا۔ اب پاکستان کرکٹ بورڈ نے ان کی جگہ فیصل حسنین کو پی سی بی کا نیا چیف ایگزیکٹو مقرر کر دیا ہے۔ فیصل حسنین جنوری 2022 میں اپنے عہدے کا چارج سنبھالیں گے، انہوں نے برطانیہ سے چارٹرڈ اکاؤنٹنٹ کی ڈگری حاصل کر رکھی ہے۔فیصل حسنین سپورٹس ایڈمنسٹریشن اور فائننس میں 35 سال سے زیادہ کا تجربہ رکھتے ہیں، وہ آئی سی سی کے چیف فنانشل آفیسر اور زمبابوے کرکٹ کے ایم ڈی رہ چکے ہیں۔ چیئرمین پی سی بی رمیز راجا نے کہا کہ فیصل حسنین کو بحیثیت چیف ایگزیکٹو پی سی بی فیملی میں خوش آمدید کہتے ہیں۔فیصل حسنین نے کہا کہ پاکستان کرکٹ بورڈ میں کام کا موقع ملنا میرے لئے فخر کی بات ہے اورمیں چیئرمین پی سی بی کی سوچ اور پاکستان کرکٹ کے فینز کی خواہشات کے مطابق پاکستان کرکٹ کی ترقی میں اپنا کردار ادا کرنے کے لیے پرعزم ہوں۔