لاہور (وقائع نگار) ٹاؤن شپ مارکیٹ میں ڈولفن اہلکار کی شہری پر فائرنگ، زخمی نوجوان کو تشویشناک حالت میں ہسپتال منتقل کر دیا گیا۔ پولیس کے مطابق ڈولفن فورس کو ون فائیو پر جھگڑے کی اطلاع ملی تھی، اہلکار پہنچے تو بخت خان نے دیکھتے ہی دوڑ لگا دی، اہلکار نے مشکوک جان کر گولی مار دی، ہسپتال میں بخت خان کی حالت تشویشناک ہے۔ ڈی آئی جی آپریشنز ڈاکٹر محمد عابد خان نے ابتدائی انکوائری کے بعد ٹاؤن شپ واقعہ میں ملوث پوری ڈولفن ٹیم کو معطل کر دیا، کانسٹیبل فیصل، خالد معظم اور عادل کی معطلی اور کلوزلائن کے احکامات جاری کر دیئے، کانسٹیبل فیصل کیخلاف دفعہ تین سوچوبیس اور پچپن سی کے تحت مقدمہ درج کرکے گرفتار کر لیا گیا۔ وزیراعلیٰ پنجاب سردار عثمان بزدار نے واقعہ کا نوٹس لیتے ہوئے سی سی پی او لاہور سے رپورٹ طلب کر لی ہے۔ وزیراعلیٰ عثمان بزدار نے واقعہ کی تحقیقات کا حکم دیتے ہوئے ہدایت کی کہ فائرنگ کے ذمہ دار اہلکاروں کے خلاف قانون کے تحت کارروائی کی جائے۔
نوجوان زخمی