لاہور(سپورٹس رپورٹر)نیوزی لینڈ کرکٹ ٹیم آئندہ سال دسمبر2022ء اور جنوری2023ء میں دو ٹیسٹ اور تین ون ڈے انٹرنیشنل میچز کھیلنے کیلئے پاکستان کا دورہ کرے گی، مہمان ٹیم اپریل 2023 ء میں ایک مرتبہ پھر پاکستان آئے گی جہاں وہ دس وائٹ بال میچز پر مشتمل سیریز کھیلے گی۔چیئرمین پاکستان کرکٹ بورڈ رمیز راجہ کی نیوزی لینڈ کرکٹ کے چیئرمین مارٹن سینیڈن سے ملاقاتوں میں تبادلہ خیال کے بعد ان دوروں کو حتمی شکل دی گئی ہے۔نیوزی لینڈ کرکٹ ٹیم کے آئندہ سال دسمبر میں پہلے دورہ پاکستان میں شامل دو ٹیسٹ اور تین ون ڈے انٹرنیشنل میچز بالترتیب انٹرنیشنل کرکٹ کونسل ورلڈ ٹیسٹ چیمپئن شپ اور آئی سی سی مینز کرکٹ ورلڈ کپ سپر لیگ کا حصہ ہوں گے۔دوسرے دورے اپریل 2023ء میں مہمان ٹیم کو پانچ ون ڈے اور پانچ ٹی ٹونٹی انٹرنیشنل میچز کھیلنے ہیں، دونوں بورڈز اب دورے کی تاریخوں کو حتمی شکل دیں گے۔چیئرمین پاکستان کرکٹ بورڈ رمیز راجہ نے کہا ہے کہ وہ مارٹن سینیڈن اور ان کے بورڈ کے شکر گزار ہیں اور ان سے ہونی والی ملاقاتوں کے نتائج پر بھی بہت خوش ہیں۔ یہ دونوں بورڈز کے مضبوط تعلقات کی ضمانت اور اس بات کی تصدیق ہے کہ پاکستان کرکٹ برادری کا ایک اہم رکن ہے۔نیوزی لینڈ کرکٹ کے چیف ایگزیکٹو ڈیوڈ وائٹ کا کہنا ہے کہ رمیز راجہ اور مارٹن سینیڈن کی دبئی میں نتیجہ خیز اور تعمیری گفتگو ہوئی، جس سے دونوں بورڈز کے تعلقات بھی مزید مضبوط ہوئے ہیں۔خیال رہے کہ اب پاکستان مارچ 2022 ء سے اپریل 2023 ء کے دوران آسٹریلیا، انگلینڈ اور نیوزی لینڈ کیخلاف 8 ٹیسٹ، 11 ون ڈے اور 13 ٹی ٹونٹی میچز کی میزبانی کریگا۔رواں سال ستمبر میں ہونے والا دورہ پاکستان نیوزی لینڈ کرکٹ ٹیم نے سکیورٹی خدشات کے پیش نظر ختم کردیا تھا۔پی سی بی نے کہا کہ دونوں بورڈز، سیریز کی تاریخ کو حتمی شکل دینے کے لیے مل کر کام کریں گے، جس کے بعد تاریخوں کا اعلان کیا جائے گا۔