اسلام آباد/ کوئٹہ ( نوائے وقت رپورٹ+اے پی پی) آئندہ 24گھنٹوں کے دوران اسلام آباد‘ لاہور‘ قصور ‘ اوکاڑہ  سمیت ملک کے مختلف علاقوں میں بارش کا امکان ہے۔ گزشتہ روز محکمہ موسمیات کی جانب سے جاری تفصیلات کے مطابق آج اتوار کو بلوچستان، خیبر پی کے، خطہ پوٹھوہار، وسطی/جنوبی پنجاب، گلگت بلتستان اور کشمیر میں بارش اور برفباری متوقع ہے۔ جبکہ پنجاب کے میدانی علاقوں میں دھند اور سموگ چھائی رہے گی۔ مغربی ہواؤں کا سسٹم بلوچستان میں داخل ہو گیا۔ محکمہ موسمیات کے مطابق سسٹم شمالی مغرب میں داخل ہوا ہے۔ وادی کوئٹہ میں گرج چمک کے ساتھ بارش ہوئی۔ جس سے موسم مزید سرد  ہو گیا ہے۔ شمالی بلوچستان میں بارش اور پہاڑوں پر برفباری کا امکان ہے۔