لاہور(سٹی رپورٹر) لاہور ویسٹ مینجمنٹ کمپنی کے تمام افسران اور عملے کو بروقت صفائی آپریشن مکمل کرنے کیلئے متحرک کر دیا گیا ۔اس مقصد کے حصول کیلئے تمام ٹاؤنز منیجرز کو ورکرز کی حاضری کو بھی یقینی بنانے اور رات کے شفٹ میں ہی کنٹینرز خالی کرنے کی ہدایات بھی جاری کر دی گئی ہیں۔ترجمان ایل ڈبلیو ایم سی کے مطابق سی ای اوایل ڈبلیو ایم سی کی ہدایات پر مانیٹرنگ افسران کو صبح سویرے فیلڈ میں متحرک کر دیا گیا ہے۔ ڈپٹی سی ای او اور جی ایم آپریشن نے علی الصبح چلڈرن ورکشاپ،ویلنشیاء ورکشاپ اور شہر کے مختلف علاقوں کا اچانک دورہ کرتے ہوئے گاڑیوں کی بروقت روانگی اور عملے کی حاضری کو مانیٹر کیا جبکہ فیروز پور روڈ، پنڈی سٹاپ، اکبر چوک، اللہ ہو گول چکر، واپڈا ٹاؤن گلبرگ، لبرٹی، نور جہاں روڈ، کینال روڈ اور ملحقہ علاقوں میں صفائی کا جائزہ بھی لیا۔