لاہور(سپورٹس رپورٹر)قومی کرکٹرز نے نئے سال کی آمد پر ٹوئٹر پر مبارکباد کے پیغامات جاری کیے ہیں۔پاکستان ٹیم کے کپتان بابر اعظم نے تصویر شیئر کرتے ہوئے ہیش ٹیگ نیو ایئر 2022 کیساتھ لکھا ہے کہ آپ  سب کو نئے سال کی مبارک ہو۔دعا ہے نیا سال بہت ساری خوشیوں ،امن اور مثبت چیزوں سے بھرا ہوا ہو۔آل رائونڈر شعیب ملک نے اہلیہ ثانیہ مرزا اور بیٹے اذہان کی  تصویر شیئر کرتے ہوئے لکھا کہ سب کو نیا سال مبارک ہو۔محمد حفیظ نے نئے سال کی آمد کی مبارکباد دیتے ہوئے ٹوئٹر پرپیغام میں لکھا  کہ اس سال سب کو خوشحالی، سلامتی اور امن نصیب ہو۔آئیں دنیا کو خوشحال بنانے کیلئے اپنا کردار ادا کریں۔ فاسٹ بائولر حسن علی نے نئے سال کی مبارکباد دی ہے۔فاسٹ بائولر محمد عامر نے بھی سال نو کی مبارک باد دیتے ہوئے برج خلیفہ پر ہونے والی آتش بازی کی ویڈیو شیئر کی ہے۔قومی ٹیم کے نوجوان فاسٹ بائولر محمد وسیم نے ٹوئٹر پر  پیغام میں لکھا ہے کہ 2021 میرے لیے بہت خاص تھا۔ گزشتہ سال، میں کامیاب ترین ٹیم کا حصہ رہا اور اپنے سینے پر گولڈن سٹار (پاکستان کرکٹ بورڈ کا لوگو) سجانے میں کامیاب رہا۔محمد وسیم کا کہنا تھا کہ 2022 ء میںمیرا مقصد یہ ہے کہ محنت کو جاری رکھوں اور قومی ٹیم کو زیادہ سے زیادہ میچز جیتوا سکوں۔