گجرات (نامہ نگار) ہوٹل میں کمپریسر اور گیس سیلنڈر پھٹنے سے دھماکہ کے نتیجے میں ایک بچے سمیت 9افراد جھلس گئے۔ 3 کی حالت تشویشناک ہے۔ تفصیلات کے مطابق ظہور الٰہی سٹیڈیم کے بیرونی ہائوس میں قائم لارڈز ہوٹل میں اچانک کمپریسر گیس پریشر تیز ہونے کے باعث پھٹ گئے جس کے نتیجے میں ہونے والے زوردار دھماکے سے باورچی خانہ، تندور کی دیواریں زمین بوس ہو گئیں۔ جبکہ ہوٹل میں لگے شیشے، کھڑکیاں ٹوٹ کر دور جا گرے۔ دھماکہ میں 9 افراد افضل سکنہ جلالپور جٹاں، قیصر سکنہ جٹووکل، زاہد اقبال سکنہ سرگودھا، انصر اقبال سکنہ منگووال، عدیل بٹ سکنہ گندرہ، خرم شہزاد سکنہ ماجرہ، سجاد اللہ سکنہ معین الدین پور وغیرہ جھلس گئے جو اپنی مدد آپ کے تحت چنگ چی رکشوں پر ڈسٹرکٹ ہیڈ کوارٹر‘ عزیز بھٹی شہید ہسپتال جا پہنچے۔ جبکہ وقوعہ کی اطلاع ملتے ہی ڈی پی او گجرات عمر سلامت موقع پر پہنچ گئے اور تحقیقات کیلئے ٹیم تشکیل دے کر رپورٹ طلب کر لی۔ ڈی پی او عمر سلامت کا کہنا ہے کہ ابتدائی طور پر یہ سلنڈر دھماکہ لگتا ہے تاہم تحقیقات کے بعد اصل حقائق سامنے آئیں گے۔ دوسری جانب وزیراعلیٰ پنجاب عثمان بزدار نے نوٹس لیتے ہوئے آر پی او گوجرانوالہ سے رپورٹ طلب کر لی اور زخمیوں کو علاج معالجے کی بہترین سہولیات فراہم کرنے کی ہدایات دیں ہیں۔