لاہور(سپورٹس رپورٹر)پاکستان سپر لیگ سیزن 7 میں افتتاحی تقریب کیسی ہوگی، کون گائے گا آفیشل سانگ، شائقین کیلئے اس سلسلے میں کئی سرپرائزز رکھنے کا انکشاف ہوا ہے۔ذرائع کے مطابق انتظامیہ کی جانب سے 20 جنوری تک اس سلسلے میں ایک اعلامیہ جاری ہوگا کہ پی ایس ایل 7 کی افتتاحی تقریب کیسی ہوگی۔ذرائع کا کہنا ہے کہ پی ایس ایل 7 پہلا ایڈیشن ہوگا جس میں نت نئی چیزیں متعارف کرائی جائیں گی، چیئرمین پی سی بی رمیز راجہ شائقین کو سرپرائز دینا چاہتے ہیں۔افتتاحی تقریب کرونا پروٹوکولز کے تحت منعقد کی جائیگی اور تقریب میں اضافی اخراجات بھی نہ کرنے کا فیصلہ کیا گیا ہے، تاہم پی ایس ایل کیلئے  فینز کی شمولیت پر پی سی بی کی تمام تر توجہ مرکوز ہے۔نیشنل سٹیڈیم کراچی کے اطراف فیسٹیول جیسا ماحول بنایا جائے گا، اور فینز پارک میں بچوں کیلئے جھولے اور بڑوں کیلئے سہولیات میسر ہوں گی۔