کراچی (نیٹ رپورٹ) شہر کے پوش علاقے کلفٹن شون سرکل کے قریب بنک سے رقم لے کر نکلنے والے شہری سے 73لاکھ روپے لوٹ لیے گئے اور مزاحمت پر فائرنگ کر کے قتل کر دیا گیا۔ کلفٹن تھانے کے علاقے کلفٹن شون سرکل انڈرپاس کے قریب ڈکیتی کی واردات کے دوران مزاحمت پر نامعلوم مسلح ملزمان نے فائرنگ کر کے ایک شخص کو شدید زخمی کر دیا اور فرار ہو گئے۔ زخمی شہری دوران علاج دم توڑگیا۔ مقتول کی شناخت 35 سالہ ویربھان ولد سمرداس کے نام سے کرلی گئی۔ مقتول ویر بھان کلفٹن باتھ آئی لینڈ کا رہائشی اورکاروباری شخصیت بتایا جاتا ہے۔ ایک اور واردات میں کراچی کے علاقے صدر میں عبداﷲ ہارون روڈ پر موبائل فون کمپنی کے دفتر میں ملزمان نے اسلحے کے زور پر کیش کاؤنٹر سے 46 لاکھ روپے کی نقد رقم‘ 73 لاکھ روپے کے چیکس اور موبائل فون چھینے اور فرار ہو گئے۔ واردات کی سی سی ٹی وی فوٹیج میں واردات کے مناظر دیکھے جا سکتے ہیں۔