لاہور(سپورٹس رپورٹر)انٹرنیشنل کرکٹ کونسل نے مینز ٹی ٹونٹی ٹیم آف دی ایئر میں شامل کھلاڑیوں کے ناموں کا اعلان کر دیا ہے۔پاکستان کرکٹ ٹیم کے کپتان بابر اعظم کو آئی سی سی مینز ٹی ٹونٹی ٹیم آف دی ایئر کا کپتان مقرر کیا گیا ہے جبکہ محمد رضوان ٹیم میں وکٹ کیپر کی حیثیت سے شامل ہیں۔پاکستان کے فاسٹ بائولر شاہین شاہ آفریدی بھی آئی سی سی ٹی ٹونٹی ٹیم آف دی ایئر میں شامل ہیں جبکہ دیگر کھلاڑیوں میں انگلینڈ کے جوز بٹلر، جنوبی افریقہ کے ایڈن مارکرم‘ڈیوڈ ملر، آسٹریلیا کے مچل مارش شامل ہیں۔جنوبی افریقہ کے تبریز شمسی،آسٹریلیا کے جوش ہیزل ووڈ، سری لنکا کے وانندو ہسارنگا اور بنگلہ دیش کے مستفیض الرحمان بھی ٹیم کا حصہ ہیں۔آئی سی سی ٹی ٹونٹی ٹیم آف دی ایئر میں کوئی بھی بھارتی کرکٹر شامل نہیں ہے۔