لاہور (سپورٹس رپورٹر)کراچی کنگز کے کپتان بابر اعظم نے کہا ہے کہ شرجیل خان کے ساتھ ہمیشہ اوپننگ کرنا اچھا لگتا ہے، وہ گیم چینجر کھلاڑی ہیں۔بابر اعظم نے آن لائن پریس کانفرنس کرتے ہوئے کہا کہ شرجیل خان فٹنس پر کام کر رہے ہیں انہیں انٹرنیشنل کرکٹ کے لئے ابھی مزید فٹنس بہتر بنانے کی ضرورت ہے۔ کپتانی کی ذمہ داری ملی ہے مزید فوکس کروں گا اور اچھا کرنے کی کوشش کروں گا، پاکستان سپر لیگ سے قبل کیمپ لگانے کا فائدہ ہوا ہے، ابھی مزید ٹریننگ کریں گے۔ کراچی اور لاہور کا میچ ہمیشہ سنسنی خیز ہوتا ہے، ہم انجوائے کرتے ہیں، دونوں ٹیموں کے فینز بھی میچ میں بہت دلچسپی لیتے ہیں اس مرتبہ بھی اچھا کھیلنے کی کوشش ہو گی۔ شاہین آفریدی نے خود کو ثابت کیا ہے جبکہ حارث روف بہتر ہو رہے ہیں، شاہین ہمیشہ ٹف ٹائم دیتے ہیں اور حارث کو بھی محتاط ہو کر کھیلنا پڑتا ہے۔ ہمارے نئے کوچ پیٹر موریس منجھے ہوئے کوچ ہیں ان سے پلاننگ کی کافی بات ہوئی ہے، ہمارے پاس اچھے بائولرز ہیں امید ہے میری بائولنگ کی ضرورت نہیں پڑے گی۔کراوڈ کی وجہ سے انجوائمنٹ  ہوتی ہے، کراوڈ کم ہوا ہے لیکن پروٹوکولز کا بھی خیال رکھنا ہے، ہم سب پروٹوکولز کا خیال رکھ رہے ہیں اس کا ہم سب کو ہی فائدہ ہے۔ ایک ہی ہوٹل میں سب رہ رہے ہیں امید ہے حالات اچھے رہیں گے اور لیگ اچھی ہو گی، محمد عامر نے اچھے میچز جتوائے ہیں وہ ہمارے میچ ونر بائولر ہیں، کوشش یہی ہوتی ہے کہ مخالف کوئی بھی ٹیم ہو ہم سو فیصد کھیل پیش کریں۔مجھے پہلی مرتبہ فرنچائز کرکٹ میں کپتانی کا موقع مل رہا ہے، یہ ایک ذمہ داری ہے ، میں مزید فوکس کروں گا اور اچھا کرنے کی کوشش کروں گا۔ اس سیزن میں کراچی کنگز اچھا کرے گی۔