لاہور(سپورٹس رپورٹر) پاکستان سپر لیگ کی کراچی میں کوآرڈی نیشن کمیٹی نے تمام میچز کے تماشائیوں کی گاڑیوں کی پارکنگ کیلئے مختلف پوائنٹس مختص کیے ہیں جہاں سے شٹل سروس کے ذریعے تماشائیوں کو نیشنل سٹیڈیم تک پہنچایا جائے گا۔ڈی آئی جی سکیورٹی اینڈ ایمرجنسی سروسز ڈویژن کے ترجمان کے مطابق نیشنل سٹیڈیم کے درج ذیل پارکنگ پوائنٹس مختص کیے گئے ہیں۔گلشن اقبال میں یونیورسٹی روڈ پر بیت المکرم مسجد کے قریب حکیم سعید گرائونڈ کو پارکنگ کیلئے مختص کیا گیا ہے۔نیشنل کوچنگ سنٹر سے ملحقہ چائنا گرائونڈ صرف وی آئی پی کی گاڑیوں کی پارکنگ کیلئے مختص ہوگا۔سٹیڈیم کے اندر سی این جی سلنڈر نصب گاڑیوں کے داخلے پر سخت پابندی ہے، تماشائیوں کیلئے بھی خصوصی ہدایات جاری کی گئی ہیں۔ لمبی قطاروں میں انتظار سے بچنے کیلئے سٹیڈیم میں وقت سے پہلے پہنچیں۔12 سال سے زائد عمر کے افراد کیلئے کرونا ویکسینیشن لازمی ہے، سٹیڈیم میں داخلے سے پہلے شائقین کو ویکسینیشن سرٹیفکیٹ پیش کرنا ہوگا، سٹیڈیم میں داخلے کے وقت ماسک پہننا لازمی ہے۔این سی او سی کے منظور کردہ ضوابط کی خلاف ورزی کی صورت میں سٹیڈیم سے باہر نکال دیا جائے گا، کوئی بھی آتشی اسلحہ، کھلونا بندوق، دھماکا خیز مواد، پٹاخے، سگریٹ، ماچس، لائٹر، کوئی بھی تیز دھار مواد جیسے چاقو اور دھات یا لکڑی سٹیڈیم لے جانے کی اجازت نہیں ہے۔کسی بھی بینر، پوسٹر، پلے کارڈ جس پر مذہب یا نسل کی بنیاد پر امتیازی سلوک یا فحش باتیں درج ہوں کی سختی سے ممانعت ہے۔تماشائیوں کو گرائونڈ، فنکاروں ، کھلاڑیوں اور ساتھی تماشائیوں پر کسی قسم کی چیز پھینکنے کی اجازت نہیں ہے۔