لاہور(سپورٹس رپورٹر)پاکستان کرکٹ ٹیم کے سابق کپتان مصباح الحق نے کہا ہے کہ بڑے ملکوں کو ٹیسٹ کرکٹ کو اہمیت دینی چاہیے، آسٹریلیا کا پاکستان آنا بہت ضروری ہے۔ محمد رضوان نے بہت محنت کی ہے، مجھے اندازہ تھا کہ وہ اوپر کھیل سکتا ہے۔ محمد رضوان محنتی کرکٹر ہیں، انہوں نے کامیابی کیلئے بہت محنت کی ہے، اس لیے ان کی کامیابی کا کریڈٹ بھی انہیں جاتا ہے۔ جب میں کوچ تھا تو مجھے محسوس ہوا کہ محمد رضوان اوپر کے نمبروں پر اچھی بیٹنگ کر سکتے ہیں اور کامیاب ہو سکتے ہیں، کیونکہ میں نے انہیں کھیلتے ہوئے دیکھا تھا۔ رضوان کے پاس شاٹس ہیں، بیک فٹ پر اچھا کھیلتے ہیں، چیلنج قبول کرتے ہیں اور اسی وجہ سے انہیں اوپر کے نمبروں پر بھیجا۔آئی سی سی ایوارڈز میں پاکستان کے کھلاڑیوں نے خود کو منوایا ہے، 2021ء میں ان کی کارکردگی اچھی رہی، تین ایوارڈز بھی جیتے اور آئی سی سی ٹیموں میں بھی شامل ہوئے۔ کریڈٹ  کھلاڑیوں کو ضرور کریڈٹ ملنا چاہیے، انہوں نے اپنی محنت سے نام کمایا ہے۔ لیگز اپنی جگہ لیکن کرکٹ کیلئے ٹیسٹ فارمیٹ کا ہونا بھی ضروری ہے، یہ اور زیادہ ضروری ہے کہ سب ٹیسٹ کو اہمیت دیں، ہمارے لیے آسٹریلیا کی فل سٹرینتھ ٹیم کا آنا ضروری ہے، اس کے بعد دوسری ٹیموں نے بھی پاکستان کا دورہ کرنا ہے۔