لاہور(سپورٹس رپورٹر) لاہور قلندرز میں شامل نوجوان کرکٹر ڈین فوکس کرافٹ نے کہا ہے کہ پاکستان سپر لیگ میں ان کی نظریں قلندرز کے ڈریسنگ روم میں موجود ٹاپ پلیئرز سے کچھ سیکھنے پر مرکوز ہیں، خوشی کی بات ہے کہ وہ راشد خان، شاہین شاہ آفریدی اور حارث رؤف جیسے کرکٹرز کیساتھ ہیں۔ پاکستان میں سکیورٹی بھی بہت زبردست ہے اور ہر کوئی ان کا بہت اچھا خیال رکھ رہا ہے وہ پاکستان میں اپنے قیام کو انجوائے کررہے ہیں۔ جنوبی افریقہ انڈر 19 ٹیم کی نمائندگی کرنے والے کرکٹر نے کہا کہ پاکستان سپر لیگ میں انہیں کرکٹ کا بہت اعلیٰ معیار نظر آیا ہے، لوگ اس کو آئی پی ایل سے ملاتے ہیں، وہ آئی پی ایل تو نہیں گئے لیکن پاکستان سپر لیگ کیلئے ان کی جانب سے دس میں سے دس نمبر ہیں۔