شام (شنہوا) امریکی صدر جو بائیڈن نے کہا کہ امریکی فوج نے داعش کے موجودہ سربراہ ابو ابراہیم الہاشمی القریشی کو ایک آپریشن کے دوران شمال مغربی شام میں ہلاک کردیا ہے۔ واضح رہے ابو ابراہیم الہاشمی القریشی، جن کا اصلی نام المولا یا حاجی عبداللہ بتایا جاتا ہے، 2019ء میں داعش کے پہلے سربراہ ابو بکر البغدادی کی امریکی فضائی حملے میں ہلاکت کے بعد شدت پسند تنظیم کے سربراہ مقرر کیے گئے تھے۔ امریکی صدر نے کہا گذشتہ رات میری ہدایت پر امریکی عوام اور اتحادیوں کی حفاظت اور دنیا کو ایک محفوظ جگہ بنانے کے لیے ایک کامیاب آپریشن کیا گیا۔ ذرائع کے مطابق  شمال مشرقی صوبے ادلب میں کارروائی کی جس میں کئی سویلینز بھی مارے گئے۔ ادلب کے گھر میں امریکی سپیشل فورسز نے آپریشن کیا جس میں 13 افراد ہلاک ہوگئے۔ مرنے والوں میں 6بچے اور 4خواتین شامل ہیں۔ کئی گھنٹے تک امریکی ہیلی کاپٹرز علاقے پر پرواز کرتے رہے۔ پینٹاگون کے مطابق امریکی سپیشل فورسز نے ادلب میں کامیاب انسداد دہشت گردی آپریشن کیا۔