اسلام آباد (خبر نگار خصوصی) شمالی وزیرستان کے علاقے شیوا میں سکیورٹی فورسز اور دہشت گردوں کے درمیان فائرنگ کا تبادلہ ہوا ہے۔ فائرنگ کے تبادلے میں مطلوب دہشت گرد عرفان عرف ابودردا مارا گیا۔ پاک  فوج کے شعبہ تعلقات عامہ (آئی ایس پی آر) کے مطابق سکیورٹی فورسز کے  آپریشن کے دوران دہشت گردوں سے اسلحہ اور گولیاں برآمد کر لی گئی ہیں۔ آئی ایس پی آر کی جانب سے جاری بیان کے مطابق دہشت گرد عرفان عرف ابو دردا سکیورٹی فورسز پر حملے، اغوا اور ٹارگٹ کلنگ میں ملوث تھا۔ بیان کے مطابق مقامی لوگوں کی جانب سے سکیورٹی فورسز کے آپریشن کا خیر مقدم اور مکمل تعاون کی یقین دہانی کرائی گئی ہے۔ آئی ایس پی آر کے مطابق سکیورٹی فورسزکوعلاقے میں دہشت گردوں کے ٹھکانوں کی اطلاعات ملی تھیں، ہتھیاروں میں سب مشین گنیں، ہینڈ گرنیڈ، آر پی جی سیون راکٹ شامل ہیں۔ آلات مواصلات اور مختلف اقسام کی گولیاں بھی برآمد کی گئیں ہیں۔