اسلام آباد (خبرنگار خصوصی) آرمی چیف جنرل قمر جاوید باجوہ نے جمعرات کو کراچی کا دورہ کیا اور آرڈیننس سنٹر ملیر میں کرنل کمانڈنٹ کی تقریب میں شرکت کی۔ پاک فوج کے شعبہ تعلقات عامہ کے مطابق آرمی چیف نے میجر جنرل سید شہاب شاہد کو آرڈیننس کور کے کرنل کمانڈنٹ کے بیجز لگائے۔ آرمی چیف نے جنگ اور زمانہ امن میں بالخصوص دہشت گردی کے خلاف جنگ کے دوران آرڈیننس کور کے کردار کو سراہا۔ تقریب میں آرڈیننس کور کے حاضر سروس اور ریٹائرڈ افسران اور جوانوں کی بڑی تعداد نے شرکت کی۔ علاوہ ازیں آرمی چیف نے کراچی میں پی اے ایف ایئر وار  کالج انسٹی ٹیوٹ کا بھی دورہ کیا۔ 35ویں ایئر وار کورس کے شرکاء سے خطاب کرتے ہوئے آرمی چیف نے پاکستان ایئر فورس کی مکمل پیشہ ورانہ مہارت اور اس کی قابل رشک کامیابیوں کو سراہا۔ انہوں نے افسران پر زور دیا کہ وہ جدید ترقیات سے ہم آہنگ رہنے اور جدت کو برقرار رکھنے کے لیے مسلسل کوششیں جاری رکھیں۔ جنرل باجوہ نے کہا کہ جدید دور کے میدان جنگ میں برتری صرف اسی صورت میں برقرار رکھی جا سکتی ہے جب ہم عصری چیلنجز کے لئے ابھرتے ہوئے جدید تصورات کے مطابق ان سے نمٹنے کے لیے تیار ہوں۔ آرمی چیف نے اس بات کا اعادہ کیا کہ ہمیں دشمن کی طرف سے کسی بھی مہم جوئی کا مناسب جواب دینے کے لیے چوکنا رہنا چاہیے۔ آرمی چیف نے کراچی میں فوجی فاؤنڈیشن کے سیٹ اپ کا بھی دورہ کیا جہاں انہیں فوجی فاؤنڈیشن کے جاری اور مستقبل کے منصوبوں پر تفصیلی بریفنگ دی گئی۔ آرمی چیف نے فوجی فاؤنڈیشن کی کارکردگی اور معیاری خدمات کی فراہمی اور قومی خزانے میں بہت زیادہ حصہ ڈالنے کے عزم کو سراہا۔ قبل ازیں کراچی آمد پر آرمی چیف کا کور کمانڈر کراچی لیفٹیننٹ جنرل محمد سعید نے استقبال کیا۔
آرمی چیف