لاہور(سپورٹس رپورٹر)لاہور قلندرز میں شامل افغانستان کے کرکٹر راشد خان کی فیملی کے ارکان لاہور میں میچ دیکھیں گے۔ لاہور قلندرز کے سی او او ثمین رانا نے کہا ہے کہ راشد خان کے بھائی اور کزنز لاہور میں میچز دیکھیں گے، ان کی فیملی کے ارکان انہیں پہلی مرتبہ ایکشن میں دیکھیں گے۔ راشد خان لاہور میں کھیلنے کیلئے بے تاب ہیں، گزشتہ سیزن میں ان کی خواہش پوری نہیں ہو سکی تھی۔انہوں نے یہ بھی کہا کہ ڈیوڈ ویسا دو سال پہلے کی طرح لاہور میں کھیلنے کیلئے پرجوش ہیں، خوشی ہے کہ دو برس کے بعد لاہور میں پی ایس ایل کے میچز ہو رہے ہیں۔ لاہور میں ہر ٹیم کو سپورٹ ملتی ہے ،زیادہ سے زیادہ فینز سٹیڈیم آئیں، لاہور قلندرز کی ٹیم اپنے شہریوں کو مایوس نہیں کرے گی۔ لاہور میں کنڈیشنز اور خاص طور اوس سب کیلئے چیلنج ہوگی، پی سی بی انتظامات کر رہا ہے،امید ہے کہ اوس کے اثرات کم ہوں گے۔ چیلنجز تو رہتے ہیں لیکن پی ایس ایل کا زیادہ سے زیادہ شہروں میں ہونا بہت ضروری ہے۔