محمد معین
پاکستان سپر لیگ میں ملتان سلطانز کی نمائندگی کرنے والے ٹم ڈیوڈ نے مغربی آسٹریلیا میں کرکٹ کھیلنا شروع کی۔ ابتدائ￿  میں ان کے والد نے بہت حوصلہ افزائی کی۔ وہ گزشتہ ایڈیشن میں لاہور قلندرز کے لیے بھی کھیلے تھے۔ یہیں سے وہ نظروں میں آئے کیونکہ وہ بہت مہارت کے ساتھ بڑے بڑے چھکے مارنے پر عبور رکھتے ہیں۔ ٹم ڈیوڈ کہتے ہیں کہ "پاکستان سپر لیگ میں باؤلنگ کا معیار بہت بلند ہے اور یہاں بہت سارے نوجوان فاسٹ باؤلرز کھیل رہے ہیں۔ تماشائی بہت پرجوش ہیں اور میں یہاں کرکٹ کھیل کر واقعی لطف اندوز ہو رہا ہوں۔"فاسٹ باؤلرز بہت ہنر مند ہیں اور بطور بلے باز ان کا سامنا کرنا ایک چیلنج ہے۔ یہ ایک بہت اچھا تجربہ ہے اور میں اسے پسند کر رہا ہوں۔"ٹم ڈیوڈ کو ممبئی انڈینز نے انڈین پریمیئر لیگ میں بھی منتخب کیا ہے۔ انہوں نے پاکستان سپر لیگ کے اس ایڈیشن میں سب سے زیادہ چھکے لگائے ہیں۔ وہ کہتے ہیں "چھکے مارنے کے لیے بہت ٹریننگ کی ضرورت ہوتی ہے، یہ آسان نہیں ہے لیکن مجھے چھکے لگانا پسند ہے اور میں سخت محنت کرتا رہتا ہوں۔"ٹم ڈیوڈ نے بھی بہت زیادہ اسٹرائیک ریٹ پر کھیلا ہے اور انہوں نے رنز بنانے اور ان کی مدد کرنے پر محمد رضوان اور شان مسعود کا شکریہ ادا کیا۔ "ہمارے اوپننگ بلے باز بہت اچھے ہیں اور وہ بہت زیادہ رنز بناتے ہیں۔ میں صرف بیٹنگ کرنے جاتا ہوں اور میچ کی صورتحال کے مطابق کھیلنے کی کوشش کرتا ہوں اور ٹیم کے لیے اپنا حصہ ڈالنے کی کوشش کرتا ہوں۔"انہوں نے کہا کہ ملتان سلطانز ایک فیملی کی طرح ہے اور ماحول بہت صحت مند ہے۔ "ہم لطف اندوز ہو رہے ہیں اور اچھی کرکٹ کھیل رہے ہیں، ٹیم پرفارم کر رہی ہے اور اب تک سب نے اچھا تعاون کیا ہے۔ ہم چاہتے ہیں کہ یہ جاری رہے اور ٹیم ٹائٹل جیتے۔"ٹم ڈیوڈ نے کہا کہ وہ جس ٹیم کے لیے بھی کھیلتے ہیں اس کے لیے صرف رنز بناتے رہنا چاہتے ہیں، وہ پوری دنیا کا سفر کرنا چاہتے ہیں، نئے کھلاڑیوں سے ملنا چاہتے ہیں اور ہر وقت نئی چیزیں سیکھتے رہنا چاہتے ہیں۔ ان کا کہنا تھا کہ وہ آل راؤنڈر ہیں اور باؤلنگ بھی کر سکتے ہیں۔ "میں مشتاق احمد کے ساتھ کام کر رہا ہوں اور ان کے ساتھ ٹریننگ کر رہا ہوں۔ میں اس سال زیادہ بولنگ کر رہا ہوں اور جب بھی مجھے موقع ملے گا میں ملتان کے لیے بولنگ کروں گا۔ عمران طاہر ورلڈ کلاس ہیں اور خوشدل شاہ بھی بہت اچھی بولنگ کر رہے ہیں، اس لیے میں صرف اچھا کرنا چاہتا ہوں۔ اچھا بھی۔"ٹم ڈیوڈ آسٹریلیا کے لیے بھی کرکٹ کھیل سکتے ہیں، وہ سنگاپور کے لیے پہلے بھی انٹرنیشنل کرکٹ کھیل چکے ہیں۔ آسٹریلیا کے کپتان ایرون فنچ نے کہا کہ ٹم ڈیوڈ بہت اچھے کھلاڑی ہیں اور انہیں پاکستان کے خلاف آسٹریلیا کی سیریز یا اس سال ٹی ٹوئنٹی ورلڈ کپ سے قبل ہونے والے میچوں میں منتخب کرنے کے امکانات ہیں۔ ملتان سلطانز کی ٹیم ساتویں سیزن میں بھی بہترین کرکٹ کھیل رہی ہے۔ محمد رضوان کی قیادت میں ٹیم نے حیران کن کھیل کا مظاہرہ کیا ہے۔ شان مسعود بہترین فارم میں ہیں، خوشدل شاہ کھیل کے تینوں شعبوں میں عمدہ کھیل کا مظاہرہ کر رہے ہیں۔ عنران طاہر وکٹیں حاصل کر رہے ہیں تو ٹم ڈیوڈ بیٹنگ کے ساتھ ساتھ اہم پوزیشنز پر فیلڈنگ کرتے ہوئے مشکل کیچز بھی پکڑ رہے ہیں۔ پوائنٹس ٹیبل پر ملتان سلطانز کی ٹیم پہلے نمبر پر ہے اور یہ مشترکہ کوششوں کا نتیجہ ہے۔ فی الحال ملتان سلطانز ٹائٹل کے دفاع کے لیے فیورٹ نظر آ رہی ہے۔ دیکھنا یہ کہ اگلے مرحلے میں کامیابیوں کے سلسلے کو جاری رکھ پاتے ہیں یا نہیں۔