لاہور(سپورٹس رپورٹر) پاکستان سپر لیگ سیون کے پلے آف مرحلے کا آغاز آج سے ہوگا۔ پہلے کوالیفائر میں ملتان سلطانز او ر لاہور قلندرز کی ٹیمیں مد مقابل ہونگی ۔ میچ شام ساڑھے سات بجے قذافی سٹیڈیم میں شروع ہوگا۔ ملتان سلطانز اور لاہور قلندرزپی ایس ایل سیون میں دو مرتبہ آمنے سامنے آچکے، کراچی میںمقابلہ سلطانز ‘ لاہور میں قلندرز نے نام رہا۔ لاہور قلندرز کے فخر زمان 521 رنز بنا کر سر فہرست ہیں، 479 رنز کیساتھ محمد رضوان کی دوسری پوزیشن ہے۔ ریکارڈ نومقابلے جیت کر پلے آف تک پہنچنے والی ٹیم ملتان سلطانز جیت کیلئے پر عزم ہے۔لاہور قلندرز نے بھی فتح کیساتھ فائنل کیلئے کوالیفائی کرنے پر نظریں جما لیں۔ دونوں ٹیمیں اب تک ایک ایک مرتبہ پی ایس ایل کا فائنل کھیل چکی ہیں۔آج کی فاتح ٹیم براہ راست فائنل میں پہنچ جائے گی ۔ شکست کھانے والی ٹیم تیسری اور چوتھی پوزیشن والی ٹیموں کے درمیان میچ کی فاتح ٹیم سے ٹکرائے گی ۔ ملتان سلطانز کے وکٹ کیپر بیٹر اورکپتان محمد رضوان نے کہ ٹیم اچھی کارکردگی دکھانے کیلئے تیار ہے ۔ جیت کے تسلسل کو برقرار رکھیں گے ۔ انہیں چھوٹے بھائی نے موبائل پر ناقدین کی رائے سے آگاہ کیا تھا کہ لوگ ان کے چھکے نہ مارنے پر تنقید کرتے ہیں۔رضوان کا کہنا تھاکہ وہ سوشل میڈیا اکاؤنٹس ہینڈل نہیں کرتے ان کا اپنا فیس بک، انسٹاگرام اور ٹک ٹاک اکاؤنٹ بھی نہیں، واٹس ایپ بھی فیملی سے بات کرنے کیلئے ہے لہٰذا سوشل میڈیا کے حوالے سے ہر بات میڈیا منیجر ان تک پہنچاتے ہیں۔کھلاڑی پلے آف مرحلہ کیلئے تیار اور فائنل کھیلنے اور ٹائٹل کا دفاع کرنے کیلئے پر عزم ہیں ۔