مورو  (نوائے وقت رپورٹ) بلاول بھٹو نے کہا ہے کہ چھین رہا ہے کپتان، روٹی، کپڑا اور مکان۔ اس وقت بجلی، گیس، پٹرول سمیت ہر چیز کی قیمت آسمان پر ہے۔ یہ نیا پاکستان نہیں، مہنگا پاکستان ہے۔ پٹرول بارہ روپے مہنگا کر کے دس روپے کم کرنا بے وقوف بنانے کی کوشش ہے۔ عوامی مارچ کی وجہ سے حکمران گھبرا گئے۔ اب ان کا پتلی تماشا نہیں چلے گا، صرف تیر چلے گا۔ چیئرمین پاکستان پیپلزپارٹی بلاول بھٹو زرداری نے مورو میں عوامی مارچ سے خطاب کرتے ہوئے کہا کہ عوامی مارچ کی وجہ سے کپتان گھبرا گیا۔ پٹرول کی قیمت 10 روپے کم ہوگئی، یہ کیا سمجھتے ہیں، ان کے ڈرامے ہمیں نظر نہیں آتے؟۔ ملک کا سربراہ قوم سے خطاب میں میڈیا کی تنقید پر رونا شروع کر دیا۔ آپ اتنے ڈرپوک ہیں کہ آصف زرداری کے انٹرویو کو نشر ہونے سے روکا۔ ان میں تنقید سننے کا حوصلہ نہیں۔ بلاول بھٹو نے کہا ہے کہ چھین رہا ہے کپتان‘ روٹی‘ کپڑا اور مکان۔ اس وقت بجلی‘ گیس‘ پٹرول سمیت ہر چیز کی قیمت آسمان پر ہے۔ انہوں نے آتے ہی سب سے پہلا ڈاکہ کسانوں اور زمینداروں پر مارا۔ پانی کی تقسیم میں ناانصافی کر کے نقصان پہنچایا گیا۔ کبھی عدالت پر حملہ‘ کبھی سیاسی مخالف کو جیل بھیجا جاتا ہے۔ بلاول بھٹو زرداری نے خیر پور میں مارچ کے شرکاء سے خطاب میں کہا ہے کہ ہم عام آدمی کے حقوق کی جنگ لڑ رہے ہیں۔ سلیکٹڈ نے عوام کو لاوارث چھوڑ دیا۔ پیپلزپارٹی دور میں مشکلات کے باوجود عوام کو لاوارث نہیں چھوڑا تھا۔