اسلام آباد (نمائندہ خصوصی) 20ویں سعدیہ خان کپ اور چلڈرن اسکی چیمپئن شپ 2022 کی تقریب تقسیم انعامات پی ایف اسکی ریزورٹ نلتر میں منعقد کی گئی۔ پاک فضائیہ کے ڈائریکٹر جنرل ایڈ منسٹریشن کی اہلیہ بیگم ملیحہ عمران تقریب کی مہمانِ خصوصی تھیں۔تقریب سے خطاب کرتے ہوئے مہمان خصوصی نے پاکستان میں سرمائی کھیلوں کے فروغ کیلئے پاک فضائیہ اور ونٹر سپورٹس فیڈریشن آف پاکستا ن کی کاوشوں کوسراہا۔ پاک فضائیہ نے20 ویں سعدیہ خان کپ اور چلڈرن اسکی چیمپیئن شپ 2022 کی ٹرافی اپنے نام کر لی۔انہوں نے ان ایونٹس کے کامیاب انعقاد پرتمام منتظمین کو مبارکباد دی۔ سعدیہ خان جا ئنٹ سلالم کیٹیگری میں پاک فضائیہ کی خوسیم صاحبہ، گلگت بلتستان ونٹر اسپورٹس ایسوسی ایشن کی افرا ولی اور گلگت بلتستان اسکاؤٹس کی فاطمہ علی کو بالترتیب سونے، چاندی اور کانسی کے تمغوں سے نوازا گیا۔ سلالم کیٹیگری میں گلگت بلتستان اسکاؤٹس کی فاطمہ علی نے سونے کا تمغہ جیتا جبکہ پاک فضائیہ کہ خوسیم صاحبہ چاندی کے تمغے کی حقدار ٹھہریں۔ گلگت بلتستان ونٹر اسپورٹس ایسوسی ایشن کی افرا ولی نے کانسی کا تمغہ حاصل کیا۔