لاہور (لیڈی رپورٹر) پیپلز پارٹی کی خواتین رہنماؤں نے کہا ہے کہ ہم لاہور میں بلاول بھٹو اور آصفہ بھٹو زرداری کو خوش آمدید کہتی ہیں۔ ہم بہت دنوں سے اس دن کی منتظر تھیں اور جوش و خروش سے تیاریوں میں مصروف تھیں۔ لانگ مارچ کامیاب ہو چکا ہے۔ تحریک عدم اعتماد بھی کامیاب ہوگی۔ یہ عوامی مارچ حق ملکیت، حق روزگار، حق حاکمیت اور حق برابری کیلئے ہے اور پاکستان کا پہلا تاریخی لانگ مارچ ہے جو اتنا کامیاب رہا۔ ہر شہر سے لوگ جوق در جوق  قافلے میں شامل ہو کر مہنگائی کے خلاف احتجاج اور بی بی شہید کی پارٹی سے اپنی محبت کا اظہار کرتے رہے۔ نوائے وقت سے گفتگومیں ثمینہ گھرکی، ثمینہ پگانوالہ صغیرہ اسلام، فائزہ ملک نے کہا کہ لاہور سے خواتین ایک بڑی تعداد مارچ میں شامل ہونے کیلئے تیار ہے۔ لاہور والوں نے اپنے لیڈر ان اور انکے قافلے کا بھرپور استقبال کیا ہے۔ ہم بی بی کے بیٹے کے لاہور آنے پر بہت خوش ہیں۔ نرگس خان، نیلم اعوان اور سونیا خان نے کہا کہ مارچ سے حکمرانوں کے ہاتھ پاؤں پھول رہے ہیں۔ یہ لانگ مارچ کا ہی اثر تھا کہ پٹرول سستا کر دیا گیا۔