لاہور(سپورٹس رپورٹر)آسٹریلیا کرکٹ ٹیم کے کوچ اینڈریو میکڈونلڈ بھی قومی ٹیم کے کپتان بابر اعظم کی اننگز کے معترف ہوگئے، کہا کہ کراچی ٹیسٹ میں پاکستان کرکٹ ٹیم کو کریڈٹ جاتا ہے، خاص طور پر بابر اعظم نے شاندار اننگز کھیلی اور ہمیں جیتنے نہیں دیا۔مہمان ٹیم کے کوچ اینڈریو میکڈونلڈ نے عندیہ دیا کہ اگر مچل سٹارک تازہ دم رہتے ہیں تو سیریز کے فیصلہ کن ٹیسٹ تیسرے ٹیسٹ میچ میں کھیلیں گے۔ تیسرے ٹیسٹ سے پہلے ہمیں 4 روز ملے ہیں ہمارے پاس بنچ سٹرینتھ بھی اچھی ہے، جو کھلاڑی نہیں کھیلے وہ مکمل تیار ہیں، ان کا آپشن ہمارے پاس موجود ہے، ہم ہر دفعہ پچ کا جائزہ لیتے ہیں اس مرتبہ بھی قذافی سٹیڈیم کی پچ دیکھیں گے۔ لیگ سپنر مچل سویپسن نے اچھی بائولنگ کی اور کئی چانسز نکالے، ہم قذافی سٹیڈیم جا کر دیکھیں گے کہ وہ کس قدر پلان میں شامل ہیں، ہم کنڈیشنز کا جائزہ لیں گے اور درست فیصلے کریں گے۔ کراچی ٹیسٹ کے پانچویں روز بہت مواقع ملے لیکن ان سے فائدہ نہ اٹھا سکے، ہم نے پاکستان میں پندرہ دن کی ٹیسٹ کرکٹ میں سے دس روز اچھی کرکٹ کھیلی ہے۔ کھلاڑیوں کا مورال بلند ہے انہیں علم ہے کہ اب آخری ٹیسٹ میچ ہے۔