لاہور(سپورٹس رپورٹر)قومی ٹیم کپتان بابراعظم، وکٹ کیپر بیٹر محمد رضوان اور فاسٹ بولر شاہین شاہ آفریدی کوآئی سی سی کے ایوارڈ ملے ہیں۔آئی سی سی نے کپتان بابر اعظم کو ایک روزہ کرکٹر آف دی ایئر کا ایوارڈ بھجوایاجو انہیں مل گیا۔ شاہین شاہ آفریدی کو کرکٹر آف دی ایئر اور محمد رضوان کو ٹی 20 کرکٹر آف دی ایئر کا ایوارڈ بھیجا ہے۔شاہین شاہ آفریدی نے آئی سی سی ایوارڈ ملنے پر کہا کہ پاکستان کی نمائندگی کرنے پر ٹرافی اٹھانا اعزاز کی بات ہے۔ بابراعظم اور محمد رضوان کو بھی آئی سی سی ایوارڈ ملنے پر مبارک باد دیتا ہوں۔وکٹ کیپر محمد رضوان کا آئی سی سی ایوارڈ کی ٹرافی ملنے پر شاعرانہ انداز میں تبصرہ کیا۔انہوں نے اپنے پیغام میں شاعر مشرق ڈاکٹر علامہ محمد اقبال کی نظم ساقی نامہ کا ایک شعر لکھا۔محمد رضوان نے لکھا کہ ’سمجھتا ہے تو راز ہے زندگی۔ فقط ذوق پرواز ہے زندگی۔ بابراعظم اور شاہین شاہ آفریدی کو بھی ٹرافیاں جیتنے پر مبارک باد دیتا ہوں۔کپتان بابر اعظم کو آئی سی سی ون ڈے انٹرنیشنل پلیئرآف دی ایئر کی ٹرافی مل گئی جس کی تصویر انہوں نے شیئر کی۔ ٹوئٹر پر بابر اعظم نے ایک پیغام جاری کیا، ساتھ میں تصویر شیئر کی۔ تصویر میں ٹرافی کو تھامے بابر اعظم انتہائی خوش نظر آرہے ہیں جبکہ اس کے ساتھ انہوں نے تحریر کیا کہ بلاآخر یہ یہاں ہے۔