لاہور(سپورٹس رپورٹر)قومی ٹیم کے کپتان پاکستان کرکٹ ٹیم بابر اعظم نے کہا ہے کہ ہوم گراونڈ پر پہلی مرتبہ ٹیسٹ میچ کھیلنا ایک الگ احساس ہوتا ہے جسے الفاظ میں بیان نہیں کر سکتا۔بابر اعظم نے لاہور میں تیسرے ٹیسٹ میچ سے قبل آن لائن پریس کانفرنس کرتے ہوئے کہنا تھا کہ ہوم گراونڈ اور ہوم کراؤڈ کے سامنے اپنا بہترین دینے کی کوشش کروں گا کیونکہ میں پہلی مرتبہ لاہور میں ٹیسٹ میچ کھیل رہا ہوں۔بیٹرز کے نیٹ سیشنز میں بائولنگ کرنے کے حوالے سے پوچھے جانے والے سوال کے جواب میں بابر اعظم نے کہا کہ محمد رضوان ہمیشہ مدد کرنے کیلئے بائولنگ کرتے ہیں اور ہم ایک دوسرے کی مدد کرنے کوشش کرتے ہیں۔ اظہر علی کی پاکستان کرکٹ کیلئے بڑی خدمات ہیں، وہ ہمیشہ اچھا کھیلتے ہیں، ایک میچ کی پرفارمنس پر کسی کو باہر نہیں بٹھا سکتے، پْر اعتماد ہو کر میدان میں جائیں گے اور کوشش ہو گی کہ میچ جیتیں۔ پلئینگ الیون آج دوبارہ پچ دیکھ کر پلان کریں گے، میچ سے قبل فیصلہ ہو گا اور سیریز جیتنا ہمارے لیے بہت ضروری ہے، ہمارا مائنڈ سیٹ یہی ہے کہ میچ جیتنا ہے ٹیسٹ سیریز جیتنے سے ہمارے اعتماد میں اضافہ ہو گا، ہم لاہور ٹیسٹ میں رزلٹ چاہتے ہیں، پوری ٹیم لاہور میں پہلی مرتبہ ٹیسٹ کھیلنے کیلئے پرجوش ہے، ہم چاہتے ہیں کہ لاہور میں کامیابی حاصل کریں اور اس کیلئے سخت محنت بھی کر رہے ہیں۔ پچ زیادہ مختلف نہیں لگ رہی لیکن مجھے لگتا ہے اس پچ سے ٹرن ملے گا، ٹاس جیتنے کیساتھ ساتھ اچھا پرفارم کرنا بھی ہوتا ہے، یہ ضرور ہے کہ چوتھی اننگز میں بائولنگ کرنا مشکل ہوتا ہے لیکن یہ ٹیسٹ کرکٹ کا حصہ ہے۔رن ریٹ کے حوالے سے ہونے والی تنقید کے سوال کے جواب میں بابر اعظم نے کہا کہ اچھا کریں تب بھی تنقید ہوتی ہے اور اچھا نہ کریں تب بھی ہوتی ہے، ہم تنقید کو منفی نہیں لیتے، ہم ایک دوسرے کو سپورٹ کرتے ہیں، رن ریٹ صورتحال کے مطابق ہوتا ہے، رن ریٹ اتنا سلو نہیں ہے۔ فواد عالم سے اسی طرح توقع ہے جیسے ہمیشہ ہوتی ہے، انہیں علم ہے کہ کیسے کم بیک کرنا ہے اور وہ اچھا کھیلیں گے۔آسٹریلوی ٹیسٹ ٹیم کے کپتان پیٹ کمنز کا کہنا ہے کہ سیریز کے آخری ٹیسٹ میں کراچی ٹیسٹ میچ کی ہی الیون ہو گی، مجھے اپنی الیون پر اعتماد ہے، ہم اب زیادہ چانسز مس کرنا افورڈ نہیں کر سکتے، ریورس سوئنگ کا کردار اہم ہو گا۔لاہور میں آن لائن پریس کانفرنس کرتے ہوئے پیٹ کمنز نے کہا کہ پچ پر گراس نہیں ہے میں زیادہ اس پچ کے بارے میں کچھ نہیں کہہ سکتا کہ یہ کتنی مختلف ہے۔ ہم سیریز جیتنے کیلئے پر اعتماد ہیں اس کیلئے ہمیں چانس مس نہیں کرنا، ہمیں دو سپنرز کی ضرورت ہے ہم نے آپشنز پر غور کیا لیکن ہم سمجھتے ہیں کہ یہی الیون بہتر ہے۔ کراچی میں ہمارے پاس جیتنے کا موقع تھا لیکن ہم اس موقع سے فائدہ نہ اٹھا سکے، ہمیں فیلڈنگ میں زیادہ غلطیاں نہیں کرنا ہونگی۔ یہ بڑا میچ ہے، فاسٹ بائولرز کیلئے موسم بہت گرم ہے، ان کنڈیشنز میں کھیلنے کا زیادہ تجربہ نہیں ہے۔یہاں پی ایس ایل کے دوران زیادہ میچز ہوئے ہیں اس لئے پچز ایسی ہیں، بابر اعظم کراچی میں غیر معمولی اننگز کھیلے ہم نے ان کیلئے پلانز بنائے اب انہی پلانز پر کام کریں گے۔بابر نے اچھی لمبی اننگز کھیلی، پاکستان ٹیم بھی اچھا کھیلی اور ڈیڈ پچز کا بھی عمل دخل ہے۔