لاہور(سپورٹس رپورٹر) محمد نواز کی جگہ زاہد محمود قومی وائٹ بال سکواڈ کا حصہ بن گئے وہ آسٹریلیا کیخلاف تین ون ڈے اور ایک ٹی ٹونٹی انٹرنیشنل میچز کیلئے قومی سکواڈ میں شامل ہوگئے ہیں۔محمد نواز تاحال پاؤں کی انجری سے مکمل صحتیاب نہیں ہو سکے وہ پی ایس ایل 7 کے دوران انجری کا شکار ہوئے تھے۔زاہد محمود لیگ اسپنر شاداب خان کے کوور کے طور پر بھی سکواڈ میں شامل ہوں گے۔ سیریز سے قبل شاداب خان کی فٹنس کا بھی جائزہ لیا جائیگا۔پاکستان اور آسٹریلیا کے مابین وائٹ بال سیریز 29 مارچ سے لاہور میں شروع ہوگی۔چیف سلیکٹر محمد وسیم کا کہنا ہے کہ بدقسمتی سے محمد نواز تاحال مکمل فٹ نہیں ہوسکے ہمیں سیریز سے قبل شاداب خان کی انجری کا بھی دوبارہ جائزہ لینا ہے زاہد محمود پہلے ہی ٹیسٹ سکواڈ کے ہمراہ ہیں، لہٰذا انہیں وائیٹ بال سکواڈ میں شامل کرلیا گیا ہے۔