لاہور (نیوز رپورٹر) اپوزیشن پنجاب حمزہ شہباز نے کہا ہے کہ تحریک عدم اعتماد بھاری ووٹوں سے کامیاب ہوگی۔ عمران خان نے جتنی اننگز کھیلنی تھی کھیل لی۔ لاہور میں میدیا سے گفتگو کرتے ہوئے کہا عمران خان جلسوں میں لوگوں کو تڑیاں لگاتے ہیں، جلسوں میں لوگوں کو تڑیاں لگانے سے بات نہیں بنتی۔ عمران خان کو بہت پہلے مشورہ دیا تھا اپنی انا کے بت کو توڑ دیں۔ موجودہ حکومت عوامی مینڈیٹ کھو چکی ہے۔اس وقت ملک ایک نازک مرحلے سے گزر رہا ہے، جب سے تحریک عدم اعتماد جمع ہوئی ہے عمران خان ہوش کھو چکے ہیں، انہیں پمز ہسپتال سے اپنا چیک اپ کروانا چاہیے، پمز ہسپتال انکے قریب ہے۔گذشتہ روز نیب عدالت میں پیشی کے موقع پر میڈیا سے گفتگو کرتے ہوئے اپوزیشن لیڈر کا مزید کہنا تھا کہ عمران خان کی راتوں کی نیندیں حرام ہو چکی ہیں۔ اب ممبروں کے گھروں کے اندر گھس چکے ہیں، کبھی کہتا ہے کہ آپکے بچوں کا مذاق بنے گا، کبھی کہتا ہے کہ آپ کے بچوں کے رشتے نہیں ہوں گے۔ نواز شریف سے منی لانڈرنگ کا حساب مانگتے ہو اس میں تو آپکے پاس کوئی ثبوت نہیں ہے، عمران نیازی نے توشہ خانہ کا حساب نہیں دیا۔ انشاء اللہ تحریک عدم اعتماد کامیاب ہو گی۔ ایوان صدر آرڈیننس  کی فیکٹری بن چکا ہے۔