اسلام آباد(نمائندہ خصوصی) بلورچستان کے علاقے سبی کے قریب ناگاو میں سکیورٹی فورسز اور دہشت گردوں کے مابین فائرنگ کے تبادلے میں 6 دہشت گرد ہلاک ہو گئے۔ پاک فوج کے شعبہ تعلقات عامہ کے مطابق فورسز نے پہاڑی علاقے میں دہشت گردوں کی موجودگی سے متعلق اطلاع پر کلیئرنس آپریشن شروع کیا تو دہشت گردوں نے اپنے ٹھکانے سے فرار ہونے کی کوشش کی۔ فائرنگ کے تبادلے میں کالعدم بی این اے سے تعلق رکھنے والے نصیب اللہ بنگلزئی عرف جہانگیر، پیر جان اور رکئی کلہوئی سمیت 6 دہشت گرد ہلاک ہو گئے۔ یہ دہشت گرد سبی اور گردونواح میں سکیورٹی پر حالیہ حملوں میں ملوث تھے اور ان کا تعلق 20 جنوری کو انارکلی لاہور میں ہونے والے دھماکے سے بھی تھا۔ دہشت گردوں کی فائرنگ سے ایک فوجی جوان شہید اور ایک زخمی ہوگیا، اسلحہ اور گولہ بارود بھی برآمد کرلیا گیا۔