اسلام آباد (خبرنگار، نوائے وقت رپورٹ) مسلم لیگ ن کے صدر شہباز شریف نے وزیراعظم کے خطاب پر ردعمل میں کہا ہے کہ اقتدار ہاتھ سے جاتا دیکھ کر آپ نے بے تکی توجیحات تراشنا شروع کردی ہیں۔ وہ جو لندن پلان سے اقتدار میں آیا ہے ہر چیز میں سازش نظر آتی ہے۔ کسی شک یا غلطی میں نہ رہیں تم ہار چکے ہو کیونکہ تم نے قوم کو بے وقوف بنایا، کرپٹ ترین اور نااہل ترین حکومت بنائی۔ قبل ازیں مارچ کے حوالے سے اپنے پیغام میں انہوں نے کہا کہ  عوام مہنگائی مکاؤ مارچ میں جوق در جوق شرکت کیلئے اٹھیں اور اس نا اہل حکومت کو ختم کرکے پاکستان کا مستقبل بچالیں۔ مسلم لیگ (ن) کے صدر میاں شہباز شریف نے قوم کے نام پیغام میں کہا ہے کہ  قوم کو قائد میاں محمد نواز شریف کا ایک اہم پیغام دینا چاہتا ہوں کہ عمران نیازی کے اس ساڑھے تین سالہ دور میں پاکستان میں سب سے اونچی سطح پر مہنگائی ایک سچ ہے، بدترین غربت ایک سچ ہے، اس حکومت کے دور میں بدترین کرپشن ایک سچ ہے، عام آدمی کے ساتھ ظالمانہ رویہ ایک سچ ہے۔  دریں اثنا مسلم لیگ (ن) پنجاب کے صدر رانا ثناء اللہ نے مہنگائی مکائو مارچ سے متعلق عوام کے نام پیغام میں کہا کہ نالائق ٹولے کی گرتی دیوار کو آخری دھکا دینے کا ثواب کمائیں۔