لاہور(سپورٹس رپورٹر)پاکستان کی خواتین کرکٹ ٹیم آئی سی سی ویمنز چیمپئن شپ میں اپنے سفر کا آغاز سری لنکا کیخلاف سیریز سے کرے گی۔دونوں ٹیموں کے مابین تین ون ڈے انٹرنیشنل میچز کی سیریز یکم جون سے شروع ہوگی، باقی دو میچز تین اور پانچ جون کو کھیلے جائیں گے، یہ تمام میچز کراچی کے سائوتھ اینڈ کلب میں کھیلے جائیں گے۔سیریز میں شرکت کیلئے دونوں ٹیمیں 19 مئی کو کراچی پہنچیں گی، یہاں تین روزہ ٹریننگ سیشن کے بعد دونوں ٹیموں کے مابین ٹی ٹونٹی سیریز کا آغاز ہوجائے گا، سیریز کے تین ٹی ٹونٹی انٹرنیشنل میچز 24، 26 اور 28 مئی کو کھیلے جائیں گے۔اس سیریز کیلئے قومی خواتین کرکٹ ٹیم کا 11 روزہ تربیتی کیمپ نیشنل سٹیڈیم کراچی کے اکیڈمی اوول میں منعقد ہوگا، کیمپ میں 26 خواتین کرکٹرز کو طلب کیا جائیگا۔آئی سی سی ویمنز چیمپئن شپ کا یہ تیسرا ایڈیشن ہے، پاکستان نے 16-2014 میں کھیلے گئے چیمپئن شپ کے ابتدائی ایڈیشن میں ساتویں جبکہ دوسرے ایڈیشن میں پانچویں پوزیشن حاصل کی تھی،ایڈیشن 20-2017 میں پاکستان نے نیوزی لینڈ، ویسٹ انڈیز اور سری لنکا سے بہتر پوزیشن حاصل کی تھی۔پاکستان میں کرونا کی وباء پر قابو پانے کے بعد یہ پہلی انٹرنیشنل سیریز ہوگی، لہٰذاان میچز کیلئے منیجڈ انوائرنمنٹ میں نرمی کی جائیگی، سیریز سے قبل تمام کھلاڑیوں، آفیشلز اور سپورٹ سٹاف کی کرونا ٹیسٹنگ کی جائیگی، جس شخص کا کروناٹیسٹ مثبت آئیگا اسے پانچ روز کیلئے آئسولیشن میں بھیج دیا جائیگا۔قومی خواتین کرکٹ ٹیم کی کپتان بسمہ معروف کا کہنا ہے کہ آئی سی سی ویمنز چیمپئن شپ کے میچز اپنے ملک میں کھیلنا اعزاز کی بات ہے، وہ سری لنکا کے استقبال کیلئے بہت پرجوش ہیں۔ اس سیریز کے ذریعے وہ اپنے کرکٹ سیزن کے نئے سرے سے آغاز کی منتظر ہیں، یقین ہے قومی خواتین کرکٹ ٹیم سیریز میں بہترین کارکردگی کا مظاہرہ کریگی۔اس سیریز کے اختتام پر قومی خواتین کرکٹ ٹیم سہ فریقی ٹی ٹونٹی سیریز میں شرکت کیلئے آئرلینڈ پہنچے گی، جہاں تیسری ٹیم آسٹریلیا کی ہوگی، اس کے بعد سکواڈ کامن ویلتھ گیمز میں شرکت کیلئے برمنگھم روانہ ہوجائیگا۔