لاہور(سپورٹس رپورٹر)لاہور میں سالانہ صوفی سپورٹس فیسٹول میں کبڈی اور دیسی کشتی کے مقابلے ہوئے، حکیم صوفی ریاست علی سوری قلندری زیر سرپرستی شریف پورہ چھنڈیاں والا ڈیرہ میں کبڈی فیسٹول کا انعقاد کیاگیا، فیسٹول کے مہمان خصوصی ایم این اے چودھری روحیل اصغر، چودھری شہباز ایم پی اے ،عزیز الرحمان چن صدر پیپلز پارٹی لاہور،چودھری شاہد گل لکھوڈیر، ارشد ستار صدر ریسلنگ فیڈریشن اور سابق رستم پاکستان بشیر بھولا  تھے۔ پہلے روز واپڈا اورپولیس کی ٹیموں کے درمیان کبڈی کا مقابلہ ہوا، جس میں پولیس کی ٹیم فاتح رہی، دوسرے روز دنگل مقابلوں میں لاہور سے تعلق رکھنے والے شیئر پنجاب مالو پہلوان نے حیدر علی جام پور کو ہرایا،گونگا لاہوریئے نے فیصل آباد کے محمد یار کو چت کرکے داد پائی۔ چھوٹی کشتیوں کے بھی مقابلے ہوئے۔ شائقین کی بڑی تعداد نے ان مقابلوں کو دیکھا اور پہلوانوں کی حوصلہ افزائی کی۔ محمد ریاض اور چودھری دلشاد کی زیر نگرانی ہونے والے دنگل مقابلوں کے فاتحین میں کیش پرائز اور ٹرافیاں تقسیم کی گئیں۔