لاہور +لندن(سپورٹس رپورٹر+نمائندہ خصوصی) پاکستانی نژاد برطانوی باکسر کا 27 سالہ پروفیشل کیریئر اختتام کو پہنچا۔ عامر خان نے رنگ سے ریٹائرمنٹ کا اعلان کردیا۔ ٹوئٹر پر جاری بیان میں عامر خان نے کہا کہ 27 سالہ طویل باکسنگ کا کیریئر رہا، اب گلوز اتارنے کا وقت آگیا ہے۔ اس لمحے پر میں ان تمام کھلاڑیوں اور ٹیم ارکان کا دل کی گہرائیوں سے شکریہ ادا کرنا چاہتا ہوں جن کے ساتھ مجھے مقابلہ کرنے کا موقع ملا۔ شاندار کیریئر کے اختتام پر اپنے خاندان، دوستوں اور مداحوں کا بے حد مشکور ہو جن کی حمایت اور محبت سے وہ کام کر دکھایا جس پر مجھے فخر ہے۔ میں نے 17 سالہ نوجوان کی حیثیت سے اپنے ملک کیلئے اولمپک تمغہ جیتنے اور دو بار عالمی باکسنگ چیمپئن بننے کا خواب پورا کیا۔ طویل عرصے تک پروفیشنل باکسر رہنے والے عامر خان نے لائٹ ویلٹر ویٹ کے درجے میں ورلڈ باکسنگ ایسوسی ایشن کا ٹائٹل 2009ء سے 2012ء تک اپنے نام کیا تھا۔ وہ انٹرنیشنل باکسنگ فیڈریشن کے 2011ء میں بھی عالمی چیمپئن رہے۔ 8 دسمبر 1986ء کو بولٹن میں پیدا ہونے والے عامر خان کے والدین کا تعلق پاکستان کے علاقے جہلم سے ہے جبکہ کہ ان کے اہل خانہ میں اہلیہ فریال مخدوم کیساتھ ساتھ ایک بیٹا اور دو بیٹیاں بھی شامل ہیں۔