لاہور(سپورٹس رپورٹر)فیفا ورلڈکپ 2022 ء ٹرافی دنیا کے مختلف ممالک کے دورے پر ہے اور 7 جون کو ایک روزہ دورے پر پاکستان پہنچے گی۔حیران کن بات یہ ہے کہ پاکستان فٹبال فیڈریشن کی فیفا نارملائزیشن کمیٹی کو ٹرافی کی پاکستان آمد اور اس کے شیڈول سے آگاہی نہیں دی گئی بلکہ ٹرافی کی پاکستان آمد اور اس کی ساری تفصیلات سپانسر ایک پرائیویٹ مشروب کمپنی کے حوالے کی گئی ہیں۔فیفا ورلڈکپ کے آغاز سے چھ ماہ قبل ورلڈکپ ٹرافی کے دنیا بھر کے سفر کا آغاز فیفا ہیڈ کوارٹر دبئی سے ہوا جہاں فٹبال ورلڈکپ کے فاتح آکر کیسیلا اور کاکا نے اصل فیفا ٹرافی ٹور کو نمائش کیلئے پیش کیا۔ٹرافی مختلف ملکوں کے دورے کے تیسرے مرحلے میں فیفا ورلڈ کپ میزبان ملک کویت پہنچی ہے۔ فیفا ٹرافی 7 جون کو ازبکستان سے پاکستان آئے گی اور سعودی عرب روانگی سے قبل یہ ٹرافی ایک دن پاکستان کے دارالحکومت اسلام آباد میں رہے گی۔ یہ مسلسل دوسرا موقع ہوگا جب فیفا ورلڈکپ ٹرافی پاکستان کا دورہ کریگی۔نارملائزیشن کمیٹی کے رکن شاہد کھوکھر نے بتایا کہ نارملائزیشن کمیٹی نے فیفا کو ٹرافی کی پاکستان آمد اور اس کے بارے میں تفصیلات شیئر کرنے کیلئے خط بھی لکھا لیکن اس کے باوجود ہمیں اعتماد میں نہیں لیا گیا۔ اور ہمیں نہیں بتایا گیا کہ اس کی پاکستان آمد کا شیڈول کیا ہوگا۔ غیرملکی مشروب کمپنی مین سپانسر ہے اور یہ ادارہ ہی ٹرافی کی پاکستان آمد اور اس کے سارے انتظامات دیکھ رہا ہے۔ ہمیں فیفا نے کسی بھی طرح لوپ میں نہیں لیا، یہ افسوس کی بات ہے اگر ہمیں اعتماد میں لیا جاتا تو گزشتہ ٹرافی کے پاکستان آمد کے موقع پر کیے جانے والے انتظامات سے بہتر انتظامات کرنے میں اپنا حصہ ڈالتے۔ پاکستانی میڈیا ہم سے ٹرافی کی پاکستان آمد اور اس کے بارے میں تفصیلات کیلئے بار بار رابطہ کر رہا ہے لیکن ہم اس پوزیشن میں نہیں کہ انہیں کچھ بتا سکیں۔ سپانسرتفصیلات شیئر کرنے کو تیار نہیں، پاکستان سپورٹس بورڈ سے رابطہ کیا ہے اور انہیں کچھ تفصیلات شیئر کی ہیں۔