لاہور(سپورٹس رپورٹر) انڈونیشیا کے شہر جکارتہ میں جاری ایشیا ہاکی کپ میں پاکستان نے اپنے دوسرے میچ میں انڈونیشیا کو صفر کے مقابلے میں 13گول کے بھاری مارجن سے شکست دیدی۔پینالٹی کارنر سپیشلسٹ رضوان علی نے ہیٹ ٹرک بنائی۔ اعجاز، منان، رانا وحید نے دو دو ‘ مبشر علی، شان علی، غضنفر علی اور شکیل معین نے ایک ایک گول کیا۔ پاکستان کی ٹیم ٹورنامنٹ میں اپنا آخری لیگ میچ کل26 مئی کو جاپان کے خلاف کھیلے گی۔میچ کے بہترین کھلاڑی رانا وحید قرار پائے۔پول بی میں  بنگلہ دیش نے عمان کو ایک کے مقابلے میں دو گول ہرایا ۔ فاتح ٹیم کی طرف سے اسلام نے چھٹے اور رقیب ال نے چالیسویں منٹ میں گول کیا ۔ عمان کا واحد گول الفزاری نے تئیسویں منٹ میں کیا ۔ ملائیشیا نے جنوبی کوریا کو  چار کے مقابلے میں پانچ گول سے ہرایا ۔ ملائیشیا کی طرف سے سمنتری ‘اور رحیم نے دو دو جبکہ ہمثانی نے ایک گول کیا ۔ جنوبی کوریا کی طرف سے ینگ نے دو جبکہ جنگ اور کم نے ایک ایک گول کیا ۔ جاپان نے بھارت کو دو کے مقابلے میں پانچ گول سے ہرا دیا۔  آج آرام کا دن ہے ۔ کل پول اے میںبھارت کا مقابلہ انڈونیشیا ‘پول بی میں عمان کا مقابلہ جنوبی کوریا جبکہ بنگلہ دیش کا مقابلہ ملائیشیا سے ہوگا۔