کوئٹہ، اسلام آباد، کراچی (بیورو رپورٹ+ خبر نگار خصوصی+ نوائے وقت رپورٹ) بلوچستان کے ضلع پنجگور میں سکیورٹی فورسز کی گاڑی کے قریب دھماکہ سے 5اہلکار شہید اور 3زخمی ہوگئے۔ سیکورٹی فورسز ذرائع کے مطابق جمعہ کو پروم میں  گشت پر مامور گاڑی کے قریب سڑک کنارے نصب آئی ای ڈی دھماکہ ہوا جس کے نتیجے میں لانس نائیک امین انجم، سپاہی ثقلین، سپاہی افزین عباس، سپاہی امین، سپاہی عمر شہید جبکہ لانس نائیک شہناز اقبال، لانس نائیک سعید انور، سپاہی محمد اعجاز زخمی ہو گئے۔ سیکورٹی فورسز نے واقعہ کی اطلاع ملتے ہیں جائے وقوعہ پہنچ کر علا قے کو گھیر ے میں لیکر شواہد اکھٹے کر لئے ،نعشوں اور زخمیوں کو فوری ہسپتال منتقل کر دیا ، مزید کاروائی جا ری ہے ۔اسلام آباد سے خبر نگار خصوصی کے مطابق شمالی وزیرستان میں دہشت گردوں نے فوجی چیک پوسٹ پر حملہ، اس دوران فائرنگ کے تبادلے میں سپاہی عمران خان شہید ہو گئے۔آئی ایس پی آر کے سکیورٹی فورسز کی جانب سے شمالی وزیرستان کے علاقے میں کلیئرنس آپریشن جاری ہے۔ 30 سالہ سپاہی عمران خان شہید کا تعلق جعفر آباد سے ہے۔کراچی کے علاقے بصیر آباد سے 5 دہشت گرد گرفتار کر لئے گئے۔ ایس پی بلدیہ فیضان علی کے مطابق گرفتار دہشت گردوں سے اسلحہ اور بارودی مواد برآمد کر لیا گیا، دہشت گرد قتل، اغوا برائے تاوان اور سٹریٹ کرائم کی وارداتوں میں ملوث تھے۔ مزید تفتیش جاری ہے۔پولیس نے میرپور خاص میں جھڈو کے قریب تین دہشت گرد گرفتار کر لئے۔ ڈی ایس پی کے مطابق ملزموں سے بارودی مواد، دیسی ساختہ بم، بال بیرنگ برآمد کر لئے گئے۔ گرفتار دہشت گردوں کا تعلق کالعدم تنظیم سے ہے۔