کراچی (نوائے وقت رپورٹ) کراچی سے پشاور جانے والی نجی ایئرلائن کی پرواز پی اے 602 موسم کی خرابی کے باعث حادثے سے بال بال بچ گئی۔ پرواز ناہموار ہونے پر طیارے کے مسافروں میں خوف و ہراس کی ویڈیو بھی سامنے آگئی۔ ذرائع کے مطابق یہ واقعہ 9 جون کو پیش آیا جب پشاور کا موسم اچانک خراب ہونے  اور ایئرپیکٹس کی وجہ سے طیارے کو فضا میں شدید جھٹکے لگے اور لینڈنگ سے کچھ دیر پہلے پرواز موسم کی خرابی کی وجہ سے شدید ناہموار ہو گئی۔ موصول ویڈیو میں طیارے کے اندر مسافروں کو شدید پریشانی کے عالم میں دیکھا جا سکتا ہے۔ مسافر کلمہ طیبہ کا ورد اور توبہ استغفار کرتے رہے۔ شدید چیخ و پکار کے دوران بعض مسافر دوسروں کو پرسکون رہنے کا کہتے رہے اور تسلیاں دیتے رہے۔ ذرائع کے مطابق طیارہ فضا میں کئی چکر لگانے کے بعد بحفاظت  لینڈ ہونے میں کامیاب رہا۔