اسلام آباد / وانا (خبر نگار خصوصی +این این آئی) پاک فوج کے شعبہ تعلقات عامہ  نے کہا ہے کہ قبائلی ضلع شمالی وزیرستان کے علاقے دتہ خیل میں دہشت گردوں کے ساتھ شدید فائرنگ کے تبادلے کے دوران پاک فوج کا ایک سپاہی شہید ہو گیا۔ پاک فوج کے جوانوں نے بہادری سے مقابلہ کیا اور مؤثر طریقے سے دہشت گردوں کے ٹھکانے کا پتا لگایا۔ تاہم سپاہی شاہزیب امتیاز نے بہادری سے لڑنے کے بعد جام شہادت نوش کیا، ان کی عمر 25 سال تھی اور وہ کوٹلی ستیاں کے رہائشی تھے۔ بیان میں کہا گیا کہ دہشت گردوں کا مکمل صفایا کرنے کے لیے علاقے میں کلیئرنس کا عمل جاری ہے۔ صوبہ خیبر پی کے کے ضلع باجوڑ میں پولیس چوکی پر دہشت گردوں نے دستی بم سے حملہ کیا جس کے نتیجے میں دو اہلکار زخمی   ہوگئے۔ ڈی پی او باجوڑ کے مطابق باجوڑ میں خار پل کے قریب واقع پولیس چوکی پر نامعلوم دہشت گردوں کی جانب سے دستی بم حملہ کیا گیا۔ دونوں زخمی پولیس اہلکاروں کو طبی امداد کے لیے مقامی ہسپتال منتقل کر دیا گیا ہے۔