لاہور +اسلام آباد(نامہ نگار+خبر نگار خصوصی) پاکستان پیپلز پارٹی کے کو چیئرمین، سابق صدر آصف علی زرداری گزشتہ رات خصوصی طیارے کے ذریعے اسلام آباد سے لاہور پہنچ گئے ہیں۔ آصف علی زرداری لاہور میں قیام کے دوران سیاسی سرگرمیوں میں حصہ لیں گے۔ پارٹی رہنماؤں سے ملاقاتیں کریں گے۔ اس کے علاوہ اپنا میڈیکل چیک اپ بھی کروائیں گے۔ آصف علی زرداری بلاول ہاؤس بحریہ ٹاؤن میں قیام کریں گے۔ قبل ازیں سابق صدر آصف زرداری سے وفاقی وزراء طارق بشیر چیمہ اور چودھری سالک حسین نے ملاقات کی ہے۔ اس موقع پر آصف زرداری نے کہا کہ گندم میں پاکستان کو خود کفیل بنانا اتحادی حکومت کی پہلی ترجیح ہے، کاشتکار خوشحال ہوگا تو ملک خوشحال ہو گا۔ وفاقی وزیر طارق بشیر چیمہ نے کہا کہ بجٹ میں کاشتکاروں کو خصوصی طور پر ریلیف دیا گیا ہے۔