لاہور(سپورٹس رپورٹر) سابق بھارتی سپنر ہربھجن سنگھ نے رواں سال کے آخر میں آسٹریلیا میں ہونے والے ٹی20ورلڈکپ میں پاکستان بھارت میچ سے قبل پیشگوئی کرنے سے گریز کردیا۔گزشتہ سال دبئی میں ہونے والے ٹی20ورلڈکپ میچ سے قبل بھارتی سپنر ہربھجن سنگھ نے بڑھکیں مارتے ہوئے کہا تھا کہ پاکستان ٹیم بھارت کو واک اوور دے کیونکہ وہ انہیں ورلڈکپ مقابلوں میں شکست نہیں دے سکتے۔ پاکستان کا بھارت کیخلاف کھیلنے کا کوئی مقصد نہیں، آپ ہمیں واک اوور دیں، آپ دوبارہ کھیلیں گے ہار جائیں گے۔ کیونکہ ہمارا سکواڈ انتہائی مضبوط ہے۔اسی میچ میں گزشتہ سال ٹی20 ورلڈکپ میں بابرالیون کے ہاتھوں بھارت کو 10وکٹوں سے شکست کی ہزیمت کا منہ دیکھنا پڑا تھا جبکہ میچ کے بعد محمد عامر اور شعیب اختر نے ہربھجن سنگھ کو شدید تنقید کا نشانہ بنایا تھا۔ رواں سال 23اکتوبر کو میلبورن کے تاریخ گرائونڈ روایتی حریف آئی سی سی کے ایونٹ میں ایک دوسرے کے مدمقابل ہوں گے۔