لاہور(سپورٹس رپورٹر)کامن ویلتھ گیمز، مینز ہاکی ٹورنامنٹ 29جولائی سے شروع ہوگا۔ پاکستان اپنا پہلا میچ 30 جولائی کو جنوبی افریقہ کیخلاف کھیلے گا۔ کامن ویلتھ گیمز 28 جولائی سے انگلینڈ کے شہر برمنگھم میں شروع ہوں گے جس میں ہاکی ایونٹ کا آغاز 29 جولائی سے ہوگا۔ ٹورنامنٹ میں 10 ٹیمیں شرکت کریں گی، پول اے میں پاکستان، آسٹریلیا، نیوزی لینڈ، جنوبی افریقہ اور سکاٹ لینڈ جبکہ پول بی میں بھارت، انگلینڈ، کینیڈا، ویلز اور گھانا کی ٹیمیں شامل ہیں، آسٹریلوی ٹیم اعزاز کا دفاع کرے گی۔ میگا ایونٹ میں قومی ہاکی ٹیم اپنی مہم کا آغاز 30 جولائی کو جنوبی افریقہ کے خلاف میچ سے کرے گی۔ پاکستان اپنا دوسرا پول میچ 31 جولائی کو نیوزی لینڈ، تیسرا میچ 3 اگست کو سکاٹ لینڈ جبکہ چوتھا اور آخری میچ 4 اگست کو آسٹریلیا کے خلاف کھیلے گا، ٹورنامنٹ کے دونوں سیمی فائنلز 6 اگست جبکہ فائنل 8 اگست کو کھیلا جائے گا۔